27.06.2012, 12:49 Презентирани инвестициските можности во Будимпешта
Можностите за инвестирање во повеќе сектори и инвестициската клима Македонија беа презентирани пред раководители на над 80 компании од Унгарија и Централна Европа во рамките на Македонскиот инвестициски форум што се одржа на Бизнис школата на Централно Европскиот Универзитет во Будимпешта во организација на македонската Амбасада Унгарија и Стопанската комора на Централна Европа „ЕуЧам”
Вовед во презентацијата изврши Амбасадорот на Република Македонија во Унгарија Дарко Ангелов додека директорот на Дирекцијата за технолошки развојни индустриски зони Виктор Мизо го претстави целокупниот профил на инвестицискиот амбиент и можности за инвестирање во државата.
На презентацијата беа истакнати мерките на македонската Влада за привлекување странски инвестиции, но и на потенцијалот за извоз на македонски производи во Унгарија и во Централна Европа. Присутните особен интерес покажаа за инвестиции во прехранбената индустрија и туристичките капацитети и најавија, иако Унгарија се наоѓа во рецесија, дека кај одредени компании сепак постои потенцијал за проширување на производните капацитети во држави кои нудат поволни услови, како што е Република Македонија.
Пред присутните раководители на преку 80 компании од Унгарија и Централна Европа поздравно обраќање имаа и претседателот на Стопанската комора на Централна Европа Мишел Орзан и деканот на Бизнис школата на Централно Европскиот Универзитет Мел Хорович.
По презентацијата се одржа дегустација на македонски вина, како можност за неформално запознавање и утврдување на следните чекори на заинтересираните компании за посета на Република Македонија со цел утврдување конкретните можности за инвестирање.
|
