28.06.2012, 09:56 Монти: На ЕУ и се заканува сиромаштија
Монти предупредува на сиромаштија во ЕУ ако каматите за долгот на Италија останат високи
Европската унија е под закана за сиромаштија ако нејзините лидери не соработуваат и не најдат начин да ги задржат ниски каматите за државниот долг на Италија, предупреди италијанскиот премиер Марио Монти.
Барањето на Монти имаше благо-прикриена критика против германскиот канцелар Ангела Меркел откако каматите за италијанскиот долг достигнаа рекордно висока вредност. Тоа е по информацијата дека Меркел изјавила оти „додека е жива“ нема да дозволи европските влади да ги поделат долговите.
Италијанскиот премиер пристигна во Брисел за средба со европските лидери посветена на должничката криза во еврозоната.
Монти додаде дека ако жителите на Италија се обесхрабрат дека напорите не даваат резултати, тоа би окуражило „политички сили кои велат - нека европската интеграција, еврото, таа или онаа држава одат по ѓаволите“ што би било сиромаштија за целата ЕУ. За „политички сили“ Монти го има предвид својот претходник Силвио Берлускони кој во последно време почна да зборува дека не разбира зошто Италија едноставно не се откаже од еврото.
|
