27.06.2012, 19:38 Нови 54 лека без доплата
Фондот за здравствено осигурување по преговорите со фармацевтските куќи успеа да ги намали референтните цени на уште 219 лека кои се издаваат со сини картони. За сметка на тоа се зголемени цените на други 77 лека кои се на рецепт и на товар на државата. Со оваа трета ревизија на цените на лековите за три години, пациентите добија уште 54 нови лека без доплата, а меѓу нив се препарати за бубрежни болести, за кожни заболувања, лекови за намалување на покачен крвен притисок, за срцева слабост, антибиотици, лекови што се користат при трансплантација на органи. Новите цени на лекови треба да стартуваат од 1 јули, односно најдоцна до 1 август.
"Со новата ревизија, 41 отсто од лековите се без доплата, заедно со лековите за кои се доплаќа 50 денари, пациентите 80 отсто лекови ќе добиваат без доплата или со минимална учество", рече на денешната прес-конференција Маја Змејкова-Парнарџиева, директорка на Фондот за здравствено осигурување. Според неа, од 2009 година кога имало само 77 лека без доплата, во 2012 година има 267 лека без доплата.
Со доплата до 100 денари се 43 отсто од лековите, од 100 до 500 денари се 100 лека, од 500 до 1.000 денари се доплаќа за 20 лека. Од 1.000 до 2.000 денари се плаќа за 13 лека, а над 3.000 денари се доплаќа само за еден лек.
За колку проценти се намалени цените на лековите и колкав е ќарот од тоа намалување, директорката Змејкова- Парнарџева рече дека Фондот нема заштеда, но затоа ќе заштедат пациентите. За тоа на колку лекови им се зголемува доплатата со новата ревизија од Фондот за здравствено осигурување ветија дополнителна информација. (Ј.Ј.)
|
