Јанкулоска: Селекцијата на кандидатите за полицајци ќе потрае

Пријавените 7.593 кандидати на конкурсот за 300 полицајци што заврши минатата недела е голем одѕив и проверката по сите основи ќе трае подолго време, но постапката до крај ќе биде транспарентна, изјави министерката за внатрешни работи Гордана Јанулоска.

Таа информираше дека сега е фазата на внесување на кандидатите во една софтверска апликација која ќе ги споредува по различни параметри. Следна елиминациска фаза е проверка на моторичките способности, која се очекува по неколку дена.

На новинарско прашање Јанкулоска одговори дека веб-страницата на Министерството за внатрешни работи не е сериозно оштетена од хакерскиот напад пред неколку дена. МВР ги санирало последиците и работи на откривање на сторителите.

- За среќа, немаше посериозна штета, немаше бришење на информации, пробивање на компјутерскиот систем или нешто што може посериозно да ја загрози безбедноста на системот на МВР. Успеавме да превенираме натамошно оштетување или пробивање. Веб-страницата во моментов е целосно функционална, одбиени се нападите и сега работиме на откривање на групата или поединецот што го направиле тоа, рече Јанкулоска, по претставувањето на униформите на комуналните редари во Скопје.