28.06.2012, 09:14 Премиерот Груевски на Самитот на Европската народна партија во Брисел
На проширениот Самит на најбројната партија во ЕП е најавено присуството на лидерите на земјите-членки на ЕУ
Претседателот на Владата на Република Македонија, Никола Груевски е најавен како главен гостин од земјите што се уште не се членки на Европската унија на Самитот на Европската народна партија (ЕПП) што денеска ќе се одржи во Брисел.
Покрај македонскиот премиер, на проширениот Самит на најбројната партија во Европскиот парламент е најавено присуството на лидерите на земјите-членки на Европската унија Ангела Меркел, Жан-Клод Јункер, Мариано Рахој, Виктор Орбан, Бојко Борисов, Јанез Јанша, Доналд Туск, Фредрик Рејнфелт, Јурки Катаинен, Педро Коељо и други челници на десно-ориентирани партии меѓу кои и експремиерот на Италија, Силвио Берлускони.
Како што јавува дописникот на МИА од Брисел, главна тема на проширениот Самит на ЕПП ќе биде за попладнево закажаниот Самит на Европскиот совет. Поради тоа, гости на европските десничари ќе бидат и претседателот на Европската комисија, Жозе Мануел Баросо, како и првиот човек на Европскиот совет Херман ван Ромпуј.
Првично, како што велат од Владата на Република Македонија, не е предвиден говор на премиерот Груевски на Самитот, но планирани се билатерални средби со некои од високите европски политичари.
Од земјите кои не се членки на ЕУ, покрај претседателот на македонската Влада, најавено е присуство и на премиерите на Молдавија и на Албанија, Влад Филат и Сали Бериша, претседателите на Грузија и на Ерменија, Михаил Саакашвили и Серж Саргсјан, како и членот на претседателството на БиХ Бакир Изетбеговиќ и опозициските лидери од Кипар, Србија и Хрватска, Никос Анастасиадес, Млаѓан Динкиќ и Томислав Карамарко.
Република Грција нема да биде претставена од новиот премиер Андонис Самарас поради неговата наводна болест. Наместо него, на ЕПП Самитот земјата ќе ја преставува министерот за развој и инфраструктура Костис Хацидакис.
Домаќин на овој Самит ќе биде претседателот на Европската народна партија Вилфред Мартенс, заедно со генералниот секретар Антонио Лопез-Истуриз и членовите на претседателството на ЕПП.
|
