„Плејбој“ во Македонија

Каролина - прва македонска „зајачица“

Од денеска, 1 октомври, Македонија и официјално е на картата на „Плејбој“. Или „Плејбој“ доби издание и на македонски јазик, покрај јазиците на другите 25 земји, во кои беше издаван досега. Првата македонска „зајачица“ и официјално е Каролина Гочева, која се најде на насловната страница на домашното издание на овој интернационален бренд-магазин.

Македонскиот „Плејбој“ од денес може да се најде во продажба, по цена од 250 денари, а вчера на прес-конференција во „Холидеј ин“, а вечерта и на плејбој-забава во дискотеката „69“ беше промовиран првиот број на магазинот. На прес-конференцијата Каролина изјави дека понудата да биде прва плејбој-девојка од Македонија ја прифатила како чест и привилегија.

„Среќна сум што покрај сите славни личности, кои се фотографирале за ’Плејбој’ сум и јас“. Особено ме прави горда дека ова е првиот број и што мојот пикториал е на насловната страница“, изјави Каролина.

Инаку, првото издание на „Плејбој“ излегло во продажба во декември 1953 година, во Чикаго (САД), а на неговата насловна страница се наоѓаше Мерилин Монро. Со тој храбар чекор на Хју Хефнер и неговите соработници започна да се реализира проект што се запиша во светската историја на издаваштвото. (Ј.П.)