Заработка од 2,8 милиони долари - нова и-мејл измама

„Нигериските измами“ пак напаѓаат по е-поштата
на македонските граѓани

Горан Адамовски


Месечно наследство од 2,8 милиони американски долари ги заскокотка македонските граѓани, кои деновиве добија имејл од странство. Во електронското писмо се наведува дека станува збор за исплата на наследство од фонфови што потекнуваат од Африка, Европа и од САД.

„Вашето име се појави во централниот компјутер меѓу листата на корисници, кои ќе добијат месечна исплата од 2,8 милиони американски долари“, стои во имејлот.

Средствата, наводно, ќе биле исплатени преку платежна картичка во кои било банкомати низ светот, а дневно ќе можеле да се повлечат 5.500 долари. Директорите на фондот Ви препорачуваат да се исконтактира нивниот агент во Африка и да му ги дадете податоците за да може да Ви ги префрли парите.

Единицата за борба против компјутерски криминал при Одделот за организиран криминал во МВР, пред неколку недели ги предупреди граѓаните од т.н. „нигериски измами“. Станува збор за одлично уигран систем на измама во која бивши носители на високи функции, наследници на кралски фамилии, членови на фамилии, кои имаат бизнис за ископување дијаманти, челници на национални банки Ви нудат да станете дел од профитабилен аранжман. За контакт, Ви даваат автентични т��лефонски броеви, факсови и адреси, Интернет-портали на фирми и институции, лица и нивни лични документи, а не ретко се случува да се дадат и директни врски со амбасади, банки, министерства. Откако ќе се воспостави првичниот контакт, следуваат пораки во кои се испраќаат фалсификувани официјални документи на фирми, владини и невладини агенции, институции, сертификати за трансфер на пари или стока, фактури, меморандуми за соработка, банкарски гаранции и сметки. На нив има добро изработени печати, пломби, логоа, амблеми или холограми.

На крајот, пред да Ви бидат исплатени парите, од Вас се бара исплата на разни суми пари за намирување на измислени форми на даноци и такси, трошоци за трансфер, добивање лажни сертификати од агенции за борба против перење пари, антитероризам и слично.

„Измамниците доаѓаат до имејл-адресите на своите жртви на различни начини: ‘фишинг‘ на електронската пошта (кога добивате порака повторно да ја внесете адресата и лозинката), користење посебни видови софтверски програми за скенирање и прибирање податоци за имејл-адреси, па се' до лесно достапни извори, како што се весници, телефонски именици, жолти книги, комерцијални библиотеки...“, објаснуваат експертите.

Жртви на ваков измама станаа и неколку македонски државјани, меѓу кои и конзулот на нашата земја во Чикаго - Јовица Палашевски, како и амбасадорот во САД - Зоран Јолевски. Овие измами земаат замав и во земјава, а како пример беше наведено организирано поставување огласи со лажна содржина во кои најчесто се нуди продажба на најнови модели на телефонски апарати, компјутери...

Експертите советуваат да не се одговара на писмата со сомнителна содржина за нереални понуди со брз и голем профит од непознати лица, фирми или организации.