Понуди за плаќање на долгот за струја на рати

ЕВН во соработка со ЕЛЕМ им овозможуваат на корисниците да го платат тужениот долг за електрична енергија на рати, без камата. Како што соопштија вчера компаниите, тужениот долг, во зависност од висината, прв пат домаќинствата ќе може да го плаќаат најмногу на 12 рати, додека бизнис-корисниците, правните лица, долгот за кој се тужени ќе може да го исплатат на шест рати.

Двете компании соопштуваат дека се откажуваат од наплатата на каматите пресметани врз основа на тужените долгови.

Можноста за склучување на спогодбите трае три месеци, почнувајќи од 1 октомври до 31 декември 2010 година. Домаќинствата ќе можат да потпишат спогодби за плаќање на рати и тоа под следниве услови: за долг од 5.000 до 9.000 денари ќе има две рати, а од над 51.000 денари - 12 рати. Бизнис- потрошувачите, пак, тужениот долг за потрошена електрична енергија од 10.000 до 20.000 денари можат да го плаќаат на две рати, а над 50.000 денари на шест рати. Спогодбите за домаќинства и за правните лица се склучуваат во приемните канцеларии на сите кориснички енерго центри на ЕВН. (М.Т.)