Црвенковски и Георгиевски на иста бина

Додека се подготвува митингот, опозицијата ги отвора картите за Скопје: Стевчо Јакимовски ќе се трка за градот, а Анте Поповски за Карпош

ТатЈана Поповска


По дводецениски политички конфликт, лидерите на СДСМ и на ВМРО-НП, Бранко Црвенковски и Љупчо Георгиевски, за нецели десет дена ќе се качат на иста бина, со што и формално ќе покажат дека се обединуваат против актуелната власт предводена од ВМРО-ДПМНЕ и Никола Груевски.

Се' уште е неизвесно дали на митингот, чиј главен организатор е СДСМ, ќе се обрати Георгиевски. Во СДСМ тврдат дека се работи на сценариото и не сакаат да ги откриј��т деталите, додека во ВМРО-НП велат дека за ова прашање в понеделник ќе расправаат партиските органи.

Извесно е дека наскоро СДСМ и четирите партии ВМРО-НП, ЛДП, ОМ и Достоинство ќе ја официјализираат соработката. Од СДСМ не откриваат дали тие ќе бидат дел од опозицискиот фронт или на митингот целата опозиција ќе настапи со ново име.

На митингот што ќе се одржи на скопскиот плоштад „Македонија“ на 28 октомври ќе бидат промовирани кандидатите за градоначалници на Скопје и на другите скопски општини. На собирот, покрај СДСМ и коалицијата позната како „Пелистер“, ќе присуствуваат и партиите од опозицискиот фронт. Со митингот кој првиот социјадемократ во неколку наврати го најави како најмасовен собир досега, ќе биде заокружено „работното лето“ на најголемата опозициска партија.

„Се' уште нема конкретна одлука дали Георгиевски ќе зборува на митингот во Скопје. Кај него и кај партијата има расположение да застане на говорницата, но, сепак, в понеделник ќе бидат анализирани сите аспекти и ќе се донесе решение“, велат во партијата на Георгиевски.

Во СДСМ за ова, но и за сите прашања околу организацијата на митингот се прилично затворени. Велат дека ќе се внимаваат на сите моменти, со оглед на тоа што во иста коалиција треба да влезат своевремено двајцата најголеми политички непријатели.

Извесно е дека покрај Црвенковски, од бината ќе се обратат кандидатите за градоначалници на Скопје и на општините Центар, Аеродром, Карпош, Кисела Вода, Бутел и Ѓорче Петров. Социјалдемократите се' уште не ги откриваат адутите со кои ќе истрчаат на локалните избори во март за Скопје и скопските општини. Сепак, се' повеќе се шпекулира дека во трката за градоначалник на Скопје ќе влезе првиот човек на Општина Карпош, Стевчо Јакимовски. Наспроти тврдењата дека Јакимовски ја преферира Карпош, која ја смета за сигурна општина, во СДСМ тврдат дека со оглед на рејтингот што го има и како претседател на партиската градска организација е логично да биде кандидат за ова место.

Доколку Јакимовски се кандидира за Скопје, во Карпош, најверојатно, ќе биде номиниран Анте Поповски, претседател на партиската организација во Општина Карпош. Извесно е дека кандидат за градоначалник на Центар ќе биде претседателот на ЛДП, Андреј Жерновски. Во Ѓорче Петров фаворит на опозиционерите, најверојатно, ќе биде советникот во Градскиот совет Александар Наумовски, а за Кисела Вода ќе трча Љупчо Васовски, директор во „Тинекс“.

Се' уште е неизвесно кој ќе се бори за градоначалничката функција во Општина Аеродром, каде што изборот е меѓу Диме Велковски и Никола Велковски. На партијата на Љупчо Георгиевски и' припадна Општина Гази Баба, каде што кандидат ќе биде поранешниот градоначалник во оваа општина Борче Стефановски. За Општина Бутел се шпекулира дека ќе биде номиниран Кире Начевски.