Кавадарчани рекоа „не“ за трговски центар

Кавадарци - Во новиот центар на Кавадарци нема да се гради деловно-трговски центар. Мнозинството граѓани од реонот на градот каде што требаше да никне новиот објект кажаа „не“ за ваквата идеја на локалната самоуправа. Тие ��о анкетните листови напишале дека изградбата на центарот во целост ќе им го наруши мирот и спокојството. Градоначалникот на општина Кавадарци, Александар Панов, на јавната расправа децидно кажа дека ја почитува одлуката на мнозинството граѓани и дефинитивно на таа локација нема да се гради предвидениот објект. Дополнително преку анкета граѓаните ќе одлучат со што да се облагороди просторот на кој во моментов се поставени лимени гаражи, а жителите во околните згради повремено го претвораат и во дива депонија фрлајќи ќеси со отпад преку своите прозорци.

Панов рече дека граѓаните мора да ги отстранат лимените гаражи во најкус рок, а за објект кој требаше да се гради со пари од Светска банка или ќе се бара нова локација или парите ќе се пренаменат за друг објект.

„Со постојниот план беше планирана изградба на пазар, а со измените требаше да се создадат услови за деловен центар. Истражувањето на јавното мислење на населението треба да заврши до среда“ рече Ѓоко Митрев, адвокат кој беше дел од групата граѓани што застанаа против изградбата на трговскиот центар. Тој е задоволен што се одржала конструктивна средба со градоначалникот и што е дојдено до компромис. (А.Д.)