Груевски го промовира Трајановски

Премиерот Никола Груевски, коментирајќи ја одлуката на здружената опозиција Јани Макрадули да биде нејзин кандидат за градоначалник на Скопје, практично го промовираше градскиот татко Коце Трајановски за кандидат за нов четиригодишен мандат во главниот град, користејќи притоа хипотетичка формулација.

„Ако Коце Трајановски е кандидат на ВМРО-ДПМНЕ, тогаш треба да се споредат неговите дела од целокупното негово дејствување во изминатите четири години и делата на Јани Макрадули и да се заклучи каков кандидат е тој и што направил во минатото за да се верува на неговите ветувања“, изјави вчера Груевски.

Според него, излишно е да се дебатира дали Јани Макрадули од СДСМ е добар кандидат за градоначалник на Скопје, бидејќи, како што вели, за тоа треба да одлучи народот. Премиерот, сепак, додаде дека „колку е некој добар кандидат треба да се суди според неговите дела од минатото“.

„Макрадули е можеби 15 години и повеќе во политиката и треба да се видат неговите дела, што тој направил за граѓаните и да се споредат со противкандидатот или противкандидатите. Граѓаните ќе донесат правилна одлука која е најдобра за нив, а не за која било партија“, потенцира Груевски. (П.Р.)