Атина ќе го анализира писмото на Попоски

Генералната оцена за одговорот од македонската Влада е дека не е доволно конкретен, дека звучи како декларирање ставови

Од нашиот дописник
Миркица Поповиќ

Атина - Се пишува само заради формата, без суштински да се преговара за името. Вака некако во аналитичарски и новинарски кругови се оценува целата дискусија за меморандумот за соработка, по одговорот од македонскиот министер за надворешни работи, Никола Попоски.

Одговорот стигна во грчкото Министерство за надворешни работи во понеделникот попладне, во почетокот на една од најкритичните недели во Грција, кога државата е преплавена од работнички штрајкови, трипартиската коалиција на Адонис Самарас стои на стаклени нозе, а Собранието гласа за новиот пакет мерки со кои треба да се осигура финансиската иднина на Грција. Од грчкото министерство испратија кусо соопштение дека одговорот е примен, во наредниот период детално ќе биде проучен и потоа ќе има соодветни соопштенија и одговори.

Весникот „Прото тема“ цитира дипломатски извори кои оценуваат дека македонскиот одговор се разликува од грчките предлози. Ова според нив е само дел од тактиката на македонската Влада да не одговара директно и суштински, со цел да добие време и да отвори долготрајна дискусија која нема да доведе до никакви конкретни резултати. Аналитичарите кои го следат спорот за името сметаат дека Попоски го одбива предлогот името да биде за севкупна употреба ерга омнес и да има јасна географска одредница. Тие од самиот почеток коментираа дека ова ќе биде спорен дел за Македонија. Исто така, тие посочуваат дека македонската Влада прави контраудар барајќи од Грција да има поголема почит кон меѓународното право и меѓународните договори, откако Атина побара да се избегнува иредентистичко однесување и да се покаже почит кон нејзиното културно и историско наследство. Споменувањето на пресудата за Грците не е изненадување, туку напротив, очекувале да ја видат во нашиот одговор.

Генералната оцена за одговорот од македонската Влада е дека не е доволно конкретен, дека звучи како декларирање ставови без некакви поконкретни предлози, какви пак се претпоставувало дека ќе стигнат. Единствено нешто што се посочува како конкретно е поканата на Попоски за Аврамопулос да дојде во посета на Македонија и повторувањето на поканата на Груевски за средба со Самарас во секое време.

Оцените во Грција по испраќањето на меморандумот беа дека со овој документ и претходните грчко-македонски преписки се прави обид да се покаже некакво придвижување во преговорите за спорот за името, поради притисок од САД и ЕУ за конечно решавање на спорот.

Со одговорот, сметаат грчките аналитичари, македонската Влада всушност се обидува да ја „добие славата“ за ова раздвижување во односите. Како доказ ги посочуваат првите реченици на Попоски, кој наведува дека меморандум е всушност грчки одговор на иницијативите од македонска страна, односно на писмото на премиерот Никола Груевски до Адонис Самарас, со што тој индиректно посочувал дека Македонија е таа која го направила чекорот за одмрзнување на замрзнатите преговори, а не Грција.

„Во суштина, се зборува за да се зборува“, потенцираат некои од аналитичарите кои сакаа да останат анонимни. Според нив, неопходно е суштинско придвижување и конечно да се види решение, при што не се клучни декларативните изјави дека се има волја за тоа, туку практично да се направат отстапки и од грчка и од македонска страна. „Без поместување од црвените линии главниот проблем повторно ќе остане нерешен“, коментираат тие.