Клинички центар стана Комплекс „Мајка Тереза“

По предлог на премиерот Никола Груевски, Владата реши да му даде ново име на Клинички центар

Клинички центар стана Комплекс клиники „Мајка Тереза“. По предлог на премиерот Никола Груевски, Владата на вчерашната седница одредила назив на урбанистичката целина каде што се сместени државните клиники од терцијарното здравство, во минатото наречени Клинички центар, или популарно - Државна болница. Новиот назив на оваа урбанистичка целина гласи Комплекс клиники „Мајка Тереза“. Владата и' препорачала на Општина Центар оваа урбанистичка целина да се преименува во „Мајка Тереза“. Освен што го менува името на Клиничкиот центар, пред извесно време Владата најави и изградба на нов клинички блок, доградба и надградба на клиниките во состав на Клиничкиот центар, изградба на една катна гаража во кругот на комплексот и на повеќе станбени објекти надвор од него.

За таа цел Министерството за здравство објави тендер за архитектонско- урбанистички проект за целиот комплекс. Идејното решение и изработката на проектот се очекува да биде завршен до крајот на оваа, односно почетокот на следната година, а потоа ќе почне процедурата за изнаоѓање градежна фирма. Изградбата на новиот објект на клиниките треба да почне кон средината на наредната година. Според Министерството за здравство, новиот клинички блок заедно со реконструкцијата на неколку клиники ќе чини околу 60 милиони евра.

И додека Владата го менува името на Клинички центар и ќе гради нов комплекс, вчера СДСМ објави дека македонското здравство бележи пад од пет места според европскиот индекс на здравствена заштита. Кај нашава земја е констатиран најголемиот вкупен пад меѓу земјите од регионот.

Македонија изгубила речиси 50 бода во петте клучни области врз кои се базира истражувањето: информирањето на пациентот, достапноста на лекувањето, времето на чекање, медицинските резултати, опсегот на услуги и лековите. Од СДСМ велат дека, всушност, овој показател само го регистрира тоа што граѓаните секојдневно го чувствуваат на своја кожа и само ја надополнува очајната слика за нашето здравство.

СДСМ апелира до Владата во најкус можен рок да ги врати одземените пари од здравството, но и да вложи во дополнителни ресурси за да ја стабилизира состојбата. А, тоа може да го стори ако скрати од реконструкцијата на мостовите, од фонтани, од рекламите. (Ек.Р.)