Поглед

Три прот��в еден

Маја Томиќ

Се прават очајнички обиди да се спречат белите мантили да штрајкуваат на 24-ти септември. Еден од полесните начини е да се направи внатрешна поделба меѓу нив. Така, ако во почетокот докторите, здружени во самостојниот синдикат на Клинички центар, беа единствени во ставот да штрајкуваат поради одлуката на Министерството за здравство за плата според успешност, сега веќе не се.

Експресно, за неполн месец се формираа уште три паралелни синдикати, чии членови се изјаснија дека не се за штрајк, но и дека не знаат која им е стратегијата, колкаво членство бројат и кои им се барањата до Владата. Ништо чудно ако за некој ден се појави уште еден здравствен синдикат.

Граѓаните се прашуваат како може на едни доктори да не им се допаѓа добивање плата по успешност, а други да ја поддржуваат таа одлука. Шпекулациите одат и до таму, дека иницијативата за паралелно формирање на уште три синдикати е на Владата, а се реализирала со помош на докторите-симпатизери на владејачката гарнитура. Целта е едноставна, да се разбијат штрајкувачките идеи, односно да нема штрајк.

На министерот за здравство Никола Тодоров, секако, не му оди во прилог бунт во неговиот ресор. Затоа тој и повлече апсурден потег - поднесе тужба против синдикатот на Клинички со која бара забрана за штрајкување додека судот не ја донесе конечната одлука. Првото рочиште е закажано веќе за утре. Тодоров го тужи синдикатот дека не го почитувал периодот за помирување и самостојно ја утврдил формата на штрајк.

И, на крајот, како и секогаш, подебелиот крај ќе го извлечат пациентите. Тие се во недоумица дали здравствените установи ќе бидат отворени за време на штрајкот и кој од лекарите од четирите синдикати ќе им ја овозможи соодветната услуга.