Топи го впери прстот во Србија

За албанскиот лидер реакциите на Смиљковци се злонамерни пораки, за Иванов меѓусебни озборувања

Слободанка Јовановска



Албанскиот претседател Бамир Топи и' го даде вчера политичкиот тон на средбата со шефот на државата, Ѓорге Иванов, порачувајќи среде Македонија дека Србија е таа од каде што доаѓаат злонамерни пораки со националистичка заднина, на кои медиумите не треба да реагираат и треба да ги изолираат.

„Вие прерставниците на медиумите треба да праќате пораки за соживот во еден заеднички простор, каде што интересот на земјата за зачленување во евроатлантските структури треба да претставува интерес на секој граѓанин и да ги изолирате сите тие злонамерни пораки што се испраќаат, што имаат националистичка заднина, особено делот што доаѓа од Србија. Работите треба да се скенираат на многу реалистичен начин. Ние сакаме европски, мирен регион каде што луѓето ќе живеат и работат во мир“, изјави Топи во контекст на последните случувања во нашата држава. Ваквата порака не го збуни Иванов, кој повикувајќи се на потребата од искрен дијалог за секое прашање, порача дека е „доста со поделби, со предрасуди, меѓусебни озборувања и работење за туѓи бели дворови.“

Посетата, иако однапред договорена, беше добар тајминг за Топи да ги осуди обидите да се даде етнички предзнак на убиствата и да ја дистанцира Албанија од случувањата, нудејќи наедно и поддршка и соработка во истрагата.

„Албанија дава силна поддршка на стабилноста на Македонија“, рече Топи, додавајќи дека се' уште има ултранационалистички кругови кои се обидуваат да ја загрозат климата во регионот, и покрај патот што е изоден меѓу нив досега и фактот дека нема враќање назад во евроинтеграцијата.

„Секој националистички или ултранационалистички рефлекс, или каква било клима на предрасуди ќе им нанесе штета на односите меѓу Mакедонците и Aлбанците во Македонија, но и на односите во регионот. Нашата заедничка порака со Иванов е дека луѓето треба да живеат во мир и хармонија, а да дејствуваат и работат во согласност со правата и законите. Секој дестабилизирачки или криминален чин треба да се третира како таков и да подлежи на сите институционални истраги и да бидат дел од правните институции“, порача недвосмислено Топи, нагласувајќи дека тоа треба да важи за сите, и Албанци и Македонци. За да го нагласи тоа, тој даде и лична нота, изјавувајќи дека тој е против какво било насилство против кого и да е, па им изрази сочувство на семејствата на жртвите во Смиљковци и на, како што рече, семејствата на другите жртви што претходеа на овој настан. Потоа го сподели мислењето дека институциите се тие што треба да го решат овој случај и изрази увереност дека тоа ќе го направат објективно и без предрасуди.

Иванов, кој поради екстензивноста и отвореноста на Топи се најде како гостин на сопствената прес-конференција, дополни дека надлежните институции одговорно се однесуваат и дека тоа го очекуваат и од другите субјекти во општеството, за да се најдат сторителите на овој грозоморен чин. Притоа извести дека со Топи договориле институциите на двете земји да соработуваат, бидејќи кога некои се охрабриле тоа да го прават кај нас, можат да го направат и на друго место.

„Очигледно е дека на некој не му е во интерес регионот да напредува и да се подобруваат состојбите. Очекуваме надлежните институции да си ја завршат својата работа, а граѓаните да не подлегнуваат на шпекулации и на разни подметнувања што се вообичаени во вакви моменти“, изјави Иванов.

Генерално пораките беа дека Албанија и Македонија ги обединува иднината, дека двете земји треба да работат што повеќе на создавање на европски вредности и дека Тирана ќе не' поддржи на самитот во Чикаго, а Топи јасно побара Рамковниот договор да биде почитуван еднакво од сите страни, изјавувајќи дека за него како претседател немало позначајно прашање од статусот на Албанците надвор.