Ново роуд шоу

Делегација на Владата на чело со претседателот Никола Груевски, од денеска до петок, 8 јуни, ќе ги посети Шведска, Финска, Данска и Норвешка, каде што е предвидено да се остварат средби на највисоко политичко ниво, како и бизнис-презентации пред повеќе заинтересирани инвеститори од овие земји.

Во состав на владината делегација ќе бидат и заменикот на претседателот на Владата задолжен за економски прашања, Владимир Пешевски, министрите за привлекување странски инвестиции, Веле Самак и Бил Павлески, како и заменик-директорот на Агенцијата за странски инвестиции и поттикнување на извозот, Христијан Делев.

Како што информираат од владината прес-служба, предвидени се средби со премиерот на Шведска, Фредрик Рајнфилд, како и со спикерот на парламентот на Шведска, Пер Вестерберг, потоа со министерот за трговија, Ева Бјорлинг, со градоначалникот на Стокхолм, Маргарета Бјорк, како и со претседателот и извршниот директор на Шведскиот трговски совет, Улф Берг.

Во Хелсинки Груевски ќе оствари средба со претседателот на Финска, Саули Ниинисто, а ќе присуствува и на вечерата што во чест на македонската делегација ја приредува амбасадорот на Канада во Финска, Кристофер Шапраданов, кој по потекло е Македонец. Во Осло е предвидена средба со премиерот на Норвешка, Јенс Столтенберг.

За време на престојот во Стокхолм, Хелсинки, Копенхаген и Осло владиниот економски тим ќе присуствува на бизнис-форуми на кои ќе ги претстави економските и инвестициските потенцијали на Македонија пред повеќе шведски, фински, дански и норвешки компании, а предвидено е одржување и на поединечни средби со претставници на потенцијални инвеститори од овие земји. (Ек.Р.)