СИРИЗА во напад на хиперпатриотите

ЛАОС и Нова демократија сакаат да ја вратат назад банкротираната позиција за име без збор Македонија - обвинува СИРИЗА

Атина - Левичарската СИРИЗА им реплицираше на постојаните напади од десничарските и националистички структури во државата за нивниот став за спорот меѓу Македонија и Грција. СИРИЗА, која се залага за сложено име со географска одредница за севкупна употреба, е под постојани обвинувања дека доколку формира влада, ќе дозволи нашата држава да го користи уставното име.

„Националистичките кругови во нашата држава сметаат дека прашањето меѓу Грција и БЈРМ ги прави привилегирани за напади против СИРИЗА. Претставувајќи се како современи борци за Македонија, одредени поранешни членови на ЛАОС и сегашни на Нова демократија го враќаат на виделина банкротираното максималистичко тврдење дека не прифаќаат решение за проблемот за името во кој ќе се содржи името Македонија“, вели Панос Тригазис, одговорен за секторот надворешна политика на СИРИЗА. Според него, во 2012 историјата се повторува како фарса, бидејќи „хиперпатриотите“ не извлекле порака од балканската историја на национализмот, па со таквото однесување само ја олеснува империјалистичката политика на раздели и владеј во корист на САД.

Тригазис ги искритикува ПАСОК и Нова демократија за креирање клима на националистичка хистерија и за воспоставување на позицијата „не признаваме држава со името Македонија“ на почетокот на признавање на нашата држава. Ваквиот однос на двете партии, според него, довел до пропуштање на можностите за решавање на спорот со пакетот на Пинеиро.

„Ставот на радикалната левица уште од самиот почеток беше дека сме за мир на Балканот и за почитување на меѓународните граници во регионот, далеку од иредентизам, надворешни вмешувања и националистичка омраза. Го поддржавме пакетот на Пинеиро и од 1992 предлагавме заеднички прифатливо решение со сложено име со географска одредница“, вели Тригазис. Оттогаш, посочи тој, поминале 15 години додека нивниот предлог станал официјална политика на Грција, а во меѓувреме повеќе од 120 држави ја признале нашата држава под уставно име. Како што се тврди од партијата, СИРИЗА од самиот почеток го поддржувала развој на билатералните односи меѓу двете држави, односно да се градат мостови на соработка, а не ѕидови меѓу Македонија и Грција.

Инаку, СИРИЗА смета дека евроатлантската политика и воените планови на НАТО веќе немаат иднина. „Ќе бараме итно повлекување на грчките сили од Авганистан и други воени мисии на НАТО или во ЕУ. Останува стабилна и непроменета нашата желба да се повлечеме од НАТО. Свесни сме за тешкотиите што доаѓаат со ова барање, но веруваме дека развојот на меѓународните настани ќе ја потврди исправноста на нашите позиции“, стои во програмата на партијата. СИРИЗА предлага надворешна политика која ќе биде заснована на почитување на човековите права и на меѓународна соработка надвор од атлантските врски, со цел развивање на соработка на државите од Балканот, Медитеранот и Русија, Кина, Индија, Латинска Америка. (М.П.)