Иванов го подбра Самарас од Мостар

Препукувања на највисоко ниво се случија викендов на „неутрален терен“ во Мостар, на регионалната средба на шефови на држави од Југоисточна Европа

Гордана Дувњак

Татнежот од дводеценискиот грчко-македонскиот спор за името, се слушна и надвор од средиштето на европската дипломатија во Брисел, но и од центрите на одлучување на воената алијанса. Препукувања на највисоко ниво се случија викендов на „неутрален терен“ во срцето на босански Мостар, на регионалната средба на шефови на држави од Југоистоична Европа.

Во маратонскиот и исцрпувачки македонско-грчкиот тениски меч, топчето на теренот на нашиот јужен сосед, овој пат го врати македонскиот претседател Ѓорге Иванов.

Запрашан со новинарско прашање како ги коментира обвинувањата од лидерот на Нова Демократија Андонис Самарас дека заедно со премиерот Никола Груевски ја дестабилизират безбедноста и стабилноста на Балканот, Иванов на заедничката прес-конференција на државите од регионот во Мостар,само кусо одговори: „Ако станува збор за изјава на лидер на партија кој заедно со Слободан Милошевиќ пред 20 години црташе нови граници на картите на Балканот, тогаш немам коментар“.

Повод за оваа реакција од Самарас беше интервјуто на претседателот Иванов за весникот „Дневник“ каде тој кажа дека Грција треба да ја почитува пресудата на Меѓународниот суд на правдата во Хаг или да не поставува дополнителни барања и услови во преговорите за името.

Лидерот на грчката десничарска партија Нова демократија, Андонис Самарас ги посочи македонскиот претседател Ѓорге Иванов и неговиот ментор премиерот Никола Груевски како главни дестабилизатори на Балканот.

„Претседателот на Скопје покажува дека не научил ништо од исходот на Самитот на НАТО во Чикаго и од добиените резултати за неговата земја. Затоа, заедно со неговиот политички ментор, премиерот Груевски, продолжуваат со својот став да ја дестабилизираат безбедноста и стабилноста на Балканот, отфрлајќи ги иницијативите на Грција за изнаоѓање фер и трајно решение за нерешените прашања меѓу двете земји“,напиша во соопштението до јавноста одговорниот за надворешна политика во Нова демократија, Панос Панајотопулос.

Ваквите тези не поминаа незабележано на домашен терен, па во духот на вжештената атмосфера на новите парламентарни избори, токму политиката за името што ја води лидерот на Нова демократија, Андонис Самарас деновиве наиде на жестоки критики од еден од комитетите на партијата СИРИЗА на популарниот Алексис Ципрас.

Во партиското соопштение, СИРИЗА остро го нападна Самарас дека води политика на антагонизам со Македонија. Во соопштението, кое го пренесоа дел од грчките медиуми, пишува дека за разлика од лидерот на Нова демократија кој не успеал да го реши спорот за името 20 години, предлогот на СИРИЗА - заемно прифатливо име со географска одредница за севкупна употреба, има за цел да ги унапреди односите меѓу двата народа. Во својата критика за политиката за името на Нова демократија, СИРИЗА ја споменува и изјавата на пратеникот Јанис Јоанидис, кој кажа дека е Македонец од Гевгелија, а неговото родно место не било ослободено од Грците. СИРИЗА прашува дали тоа што го кажа Јоанидис е официјална политика на Нова демократија или, пак, во партијата постои разногласие.

„Ако оваа теза е општоприфатена, можеби мислат дека треба да влеземе во војна со ПЈРМ, за да му ја ослободиме татковината на Јоанидис“, се вели во соопштението.