СДСМ ги кани Иванов и Груевски на итна седница

Опозиционерите сакаат да слушнат план за иднината на државата, по неуспехот во Чикаго

Наум Котевски

Опозицискиот фронт одлучи и официјално да поднесе барање за итна собраниска седница на која задолжително треба да присуствуваат претседателот Ѓорге Иванов и премиерот Никола Груевски.

Седницата, велат од опозицискиот блок, ќе има една единствена точка на дневниот ред - дефинирање на идниот план и активностите на државниот врв за исполнување на стратегиските приоритети и интереси на граѓаните за интеграција на Македонија во ЕУ и во НАТО по самитот на Алијансата во Чикаго.

Завчера 42 пратеници од опозицискиот фронт, што го предводи СДСМ, со отворено писмо до премиерот Груевски побараа тој и претседателот да соберат, како што велат, храброст и да покажат почит кон граѓаните и во Собранието да го соопштат официјалниот став на државниот врв.

Заблагодарувајќи му се на премиерот за брзиот и долг одговор на отвореното писмо што му го испратија, потенцираат дека не добиле одговор на клучното прашање - што понатаму?

„Сметаме дека граѓаните заслужуваат разумен, рационален и неемотивен одговор на тоа што ни се случи во Чикаго. Бараат одговор кои се нашите стратегиски пријатели и најмногу од се' бараат конкретен план и конкретни чекори како понатаму“, рече координаторот на пратеничката група на СДСМ, Игор Ивановски.

Тој додаде дека членството во НАТО и во ЕУ не е само членство во два политички сојуза. Тоа, вели тој, претставува стабилност, економски просперитет, можност за странски инвестиции, нови работни места, подобар живот за граѓаните и, конечно, тоа претставува иднина за која постои консензус во општеството. Ивановски го повика Груевски да не прави притисок врз претседателот на Собранието, Трајко Велјановски, да не закаже итна седница.

На прашањето кој е правецот на опозицијата според кој треба да се движи државата, Ивановски вели дека насоките не ги определуваат ниту СДСМ ниту, пак, ВМРО-ДПМНЕ.

„Уште пред 20 години нив ги одредија граѓаните на Македонија. Со огромен консензус, меѓуетнички, социјален, економски, културен, каков сакате друг, одлучија дека Македонија треба и мора да стане членка на ЕУ и на НАТО. И тоа не е само политички проект, тоа е, пред се', економски, безбедносен, социјален проект. Оттаму не смее да разговараме за правците, тие се поставени. Освен ако државниот врв има нешто друго да ни каже. Затоа бараме итна седница“, посочи Ивановски.

За ВМРО-ДПМНЕ предлогот за вонредна седница нема никаква смисла ниту цел. Посебно поради тоа што, како што велат, пораките што беа упатени од премиерот Груевски, но и поддршката од целокупната јавност се јасни, прецизни и недвосмислени.

„Вам како опозиција ви останува можноста следната недела на седницата за пратенички прашања да поставите директни прашања до претседателот на Владата на оваа или на која било друга тема“, рекоа од ВМРО-ДПМНЕ.

Руфи Османи предлага техничка влада

Лидерот на НДП, Руфи Османи, ја афирмираше идејата за формирање техничка влада за излегување, како што вели, од овој интеграциски и егзистенцијален ќорсокак. Во лошата ситуација во која се наоѓа земјата, според него, наспроти конкретната одговорност која паѓа врз грбот на актуелната власт ВМРО-ДПМНЕ - ДУИ, треба да се формира широк консензус. „Новата влада ќе има обврска да постигне историски компромис со грчката влада за спорот околу името за потоа заедно со локалните да организира и парламентарни избори во март-април 2013 година“, велат од НДП.

Според нив, исходот од Самитот во Чикаго бил познат уште од првичната агенда и тој им бил јасен на сите учесници, освен на политичките актери во Македонија.

„Со дрскост не ги прифаќаа постојаните пораки дека компромисот околу спорот со името со Грција е неизбежен како предуслов за зачленување на државата во НАТО. Некооперативните ставови на премиерот Груевски не ги зедоа предвид навремено трендовите и последиците од големата финансиска и економска криза која ги погоди главните земји-членки на НАТО и на ЕУ“, додаваат од НДП, порачувајќи и' на ДУИ дека доколку е сериозна во своите евроатлантски интеграциски политики, „сега е моментот да демонстрира реална институционална посветеност и на тој начин да даде свој придонес за надминување на овој историски предизвик за иднината на земјата“.