Истрага за „тајниот документ“ за името

Oбвинителството, засега, не бара документи од Црвенковски, туку од медиумите што ги објавиле

Скопското Јавно обвинителство не им поставило рок ниту на Бранко Црвенковски ниту на СДСМ да ги достават документите кои во изминатата недела беа предмет на жестоки полемики, а кои се однесуваат на предлогот за решавање на спорот со името што го дал медијаторот Метју Нимиц во 2005 година.

„Не знам од каде излезе тоа дека скопското Обвинителство барало од Црвенковски да ги достави документите. Вистина е дека бараме да ги видиме документите, но ги бараме од медиумите што ги објавија тие документи. Откако ќе ги добиеме, дополнително ќе треба да утврдуваме дали станува збор за документи кои се државна или службена тајна. Ова значи дека Обвинителството ќе треба да го утврди карактерот на објавеното, па дури потоа може да говориме за евентуална одговорност“, вели скопскиот јавен обвинител Марко Зврлески.

За обвинителот Зврлески е неспорно тоа дека лидерот на СДСМ, Црвенковски, кажал нешто, но, според нивните сознанија, тој за време на јавен настап не презентирал никакви документи и токму поради тоа тој не може да биде предмет на интересирање на Обвинителството. Сепак, со оглед на тоа што беа објавени документите, нема дилема дека тие ќе се бараат од државната новинска агенција МИА и евентуално од телевизијата Канал 5.

Од Обвинителството потврдуваат дека истрагата која е отворена доаѓа по јавно изречен збор во јавноста, но оттаму велат дека засега никој не е осомничен за објавените документи, се' додека додека не се утврди дали станува збор за откривање државна тајна или, пак, за службена тајна. За Обвинителството е битно да утврдат дали и кој извршил класификација на документите, односно дали со нивното објавување е предизвикана штета. Поради ова, скопското Обвинителство ќе ја води истрагата тивко и без рокови. (Љ.С.)