Владата ќе исплати 5,5 милиони евра за развој на селата


Владата ќе исплати 5,5 милиони евра за поддршка и развој на селата, за купување земјоделска механизација и чистење канали, информира на вчерашната прес-конференција владиниот портпарол Александар Ѓорѓиев.

Тој појасни дека ќе бидат исплатени 2 милиони евра за поддршка на македонските села, односно за 45 конкретни проекти во 37 општини. Средствата ќе се искористат за изградба на селски патишта, не подолги од 1 километар, за мостови, пристапни патишта до нивите и пристап до земјоделско земјиште, како и за урбанизација на централните делови на селата.

„Исплатата ќе се одвива сразмерно на изведувањето на проектот, а по неговото завршување ќе има комплетна исплата. Опфатени се сите општини од целата држава, без разлика на составот на населението, или пак политичката припадност на градоначалникот“, истакна Ѓорѓиев.

Со три милиони евра земјоделците ќе бидат поддржани при купување механизација. Од 1 август ќе бидат исплатени 1 милион евра на 200 корисници кои веќе ја имаат набавено механизацијата, а останатите 2 милиони евра ќе бидат дадени на другите 334 корисници по реализација на нивните набавки на механизацијата, во согласност со динамиката и доставувањето на документацијата, а најдоцна до октомври. Кофинансирањето е во висина од 50 проценти од трошоците за набавка на механизацијата, а исплатата се врши преку Агенцијата за финансиска поддршка во земјоделството со трансфер од Владата. Станува збор за неповратна помош. (МИА)