Растат и невработеноста и инфлацијата во еврозоната

Инфлацијата се зголемила на 2,6 отсто, а невработеноста во јули достигнала рекордни 18 милиони, што е најголем број од 1995 година

Еврoстат денеска објави дека растат и инфлацијата и невработеноста во еврозоната. Во август инфлацијата се искачила на 2,6 отсто, иако во изминатите три месеци мируваше на 2,4 отсто.

Бројот на невработени во 17-члената еврозона во јули достигна рекордни 18 милиони, што е најголем број од 1995 година, од кога и се собираат податоците.

Само во јули оваа бројка се зголемила за 88.000 невработени, иако стапката на невработеност останала непроменета на 11,3 отсто, колку што била во јуни, стои во извештајот на Евростат.

Во 27-члената Европска унија без работа биле 25,2 милиони лица, со што нивната бројка во јули се зголемила за 43 илјади.

Поединечно, најниска стапка на невработеност бележи Австрија, со 4,5 отсто, по што следуваат Холандија 5,3 отсто и Германија и Луксембург со по 5,5 отсто. Најголема стапка на невработеност е регистрирана во Шпанија 25,2 отсто и во Грција 23,1 отсто.

Бројките предизвикуваат загриженост дека европската монетарна унија и нејзините најблиски соседи можат да западнат во нова рецесија.

Новите статистички податоци покажуваат дека невработеноста во 17 членки на еврозоната во јули достигна рекордно ниво, 18 милиони невработени или за 2 милиона повеќе од истиот месец лани.

„Блумберг“ објави дека невработеноста во Германија во август се зголеми петти месец по ред, поради намалената побарувачка на германски стоки на европските пазари, предизвикана од европската должничка криза и неподготвеноста на германскиот бизнис за нови инвестиции.

Бројот на невработени се зголемил за девет илјади. Економистите кои учествувале во истражувањето на „Блумберг“ очекувале дека бројот на невработени ќе се зголеми за 7 илјади.

Компаниите ги одлагаат вработувањата и планираните нови инвестиции, бидејќи должничката криза ја намали побарувачката на европските пазари. Тоа од своја страна ги намалува изгледите за раст на германската економија.

„Силниот пазар на труд беше еден од клучните фактори за раст во првата половина на годинава“, вели Карстен Брзински, главен економист на „ИНГ гроуп“ во Брисел. „Новите податоци ја поддржуваат тезата дека пазарот на трудот постепено слабее и дека до крајот на годината позитивниот ефект врз економијата веќе нема да се чувствува толку силно“.

По објавувањето на податоците еврото остана без посебна промена и се тргува за околу 1,2548 долари. (Ек.Р.)