Регулаторот во Индија бара шест месеци затвор за Субрата Рој

Адвокатот на Субрата на сослушувањето во Врховниот суд изјави дека тој не е одговорен за враќање на 4,38 милијарди долари на измамените инвеститори

Индиската корпорација „Сахара груп“ денес му соопшти на Врховниот суд на Индија дека нејзиниот шеф, Субрата Рој, не бил одговорен за враќање на 24.000 крори, 4,38 милијарди долари, заедно со 15 отсто камата, собрани од нејзините две фирми од инвеститори. Со тоа корпорацијата им се спротивставуви на аргументите на регулаторното тело СЕБИ, кое сакаше неговиот пасош да биде одземен додека се реши жалбата по обвинението против него и компаниите за непочитување на судот, јави индискиот онлајн весник Firstpost.

Aдвокатot Рам Џетмалани, кој се појави за фирмата „Сахара“, која се соочува со обвинение за непочитување на судот заради невраќање на сумата, според судскиот налог, тврдеше дека фирмите „Сахара“ веќе извршиле отплата.

Двајцата судии, КС Радакришнан и ЏС Кехар, како што пишува весникот, го сослушале ставот на Џетмалани, истакнувајќи дека тоа е спротивно на претходниот писмен исказ од компанијата. „Тоа не е точно. Во вашата писмена изјава стои поинаку. Вашата писмена изјава го очекува нашиот одговор“, рекоа судиите.

Пазарниот регулатор тврдел дека сите пари собрани од страна на „Сахара Индија риал естејт корпорејшен“ и „Сахара Индија хаусинг инвестмент корпорејшен“ отишле во сестринските компании на „Сахара груп“ и Рој е подеднакво одговорен.

„Рој повеќе пати бараше состанок со претседателот на СЕБИ и комуницираше со СЕБИ за ова прашање многу пати. Тој сега не може да се дистанцира велејќи дека нема никаква врска со компаниите“, рече адвокатот Арвинд Датар. „Директорите и промоторите на компании треба да добијат максимална казна затвор. Тие не треба да бидат сослушани се додека 24.000 крори не се депонираат до СЕБИ“, рече тој, додавајќи: „Треба да им се наложи да бидат присутни во судот и нивните пасоши да се одземат додека судот го реши ова прашање“.

Тој побара максимална казна за Рој и другите, според член 12 од Актот за непочитување на судот, кој предвидува казна до шест месеци затвор, пишува Firstpost.

Додека трае процесот од висок интензитет во Индија, Субрата Рој во неколку наврати ја посети Македонија и ги најавува своите големи инвестициски зафати во изградбата на луксузен комплекс кај Љубаништа и изградба на современа земјоделска фарма „Џумајлија“. (Н.Р.)