Гинекологот од Чаир не ја дочека свршувачката

Шок и неверување по смртта на д-р Здравко Јошевски (51), кој почина од струен удар во купатилото од болницата

Горан Адамовски


Познатиот гинеколог Здравко Јошевски (51) не дочека да ја прослави својата свршувачка закажана неделава. Смртта го затече на работно место во бизарен инцидент. Загина од струен удар додека се туширал во бања на Специјалната болница за гинекологија и акушерство - Чаир. Од Министерството за здравство изразуваат жалење за немилиот настан и велат дека ги охрабруваат надлежните државни органи да ги откријат причините за смртта на гинекологот.

Во Гинеколошката клиника во Чаир вчера владееше мачна атмосфера. Најголем дел од вработените ја вртат главата кога ќе ги прашате за саботниот трагичен случај.

„Не можеме да зборуваме, единствено директорот може да даде изјава“, беше најчестиот одговор што го добивме. А директорот имал две операции едноподруго, па немаше време за новинарите. Не дозволи ниту сликање на кобната бања.

Сепак, лекарите кришум ќе ви кажат дека се во шок по загубата на вештиот колега и лојален пријател. „Знам дека ќе речете за починатите се зборува само најубаво, ама, верувајте, човекот беше толку мирен и кроток, добар колега, успешен во работата, веќе дваесет години работеше тука. Најстрашното е што неделава требаше да се сврши, се подготвувавме за славење“, со солзи во очите раскажува една од колешките на Јошевски.

Како се случила трагедијата? Колегите објаснуваат дека несреќниот доктор во петокот вечерта бил дежурен. Имал две породувања со царски рез, па по завршувањето на смената, отишол да се истушира.

„Пред него се туширале други колеги, ја потрошиле топлата вода, па д-р Јошевски го вклучил бојлерот. Изгледа заборавил да го исклучи кога влегол во бањата, а се зборува дека бојлерот бил неисправен“, велат вработени во болницата.

Откако докторот долго време не излегол од бањата, се загрижиле колегите, влегле да видат што се случува. Лекарот лежел на подот. Колегите најпрво мислеле дека станува збор за мозочен удар. Иако тоалетите биле стари, сепак, биле во добра состојба и никогаш порано не се случил ниту најмал инцидент, тврдат вработените.

Од Министерството за здравство велат дека директорот на болницата ги информирал дека редовно биле сервисирани електричните апарати и медицинската опрема.

Досегашните официјални информации говорат дека гинекологот починал во саботата околу 10 часот кога влегол да се тушира во бања на болницата. Поради неисправност на бојлерот, дошло до струен удар. Јошевски починал веднаш.