Емитер „Скопје“ и „Змејовата невеста“ на „Скопско лето“

Вечерва на во центарот на градот, на приодите кон плоштадот од 18 часот до полноќ во рамки на „Скопско лето“ во соработка со Друштвото на ликовни уметници на Македонија, ќе се реализира кураторскиот проект Емитер „Скопје“.

Во рамки на петтите „Скопски урбани приказни“, четири млади македонски уметници, членови на Друштвото, со интерактивни и мултимедијални дела: Марија Сотировска со „Торнадо“, Борис Шемов со „Инспиративен етер“, Дарко Алексовски со „Одмори се“ и Александар Спасоски со „Бродот што никогаш не помина“, следејќи ја тематската определба на кураторот, Бојана Јанева-Шемова, ќе се обидат да ја привлечат јавноста и со јавниот карактер на остварувањата да придонесат кон означување на постојниот јавен простор во градот. Основната идеја, од која кураторот се води, е уникатна карактеристика на Скопје, да предизвикува голем број сетилни дразби, истовремено. „Овој амалгам на визуелни, аудитивни и тактилни дразби, на така мал простор, е резултат на специфичната синергија на идеолошките и комерцијалните рекламни кампањи и на засилената потреба за сетилен хедонизам, карактеристичен за граѓаните на.Македонија“, посочува Шемова.

Во Драмскиот театар, пак, во 20,30 часот во продукција на НУЦК „Марко Цепенков“ и Театарот „Војдан Чернодрински“ од Прилеп ќе биде одиграна претставата „Змејовата невеста“ на Димитар Г. Молеров , во режија и адаптација на Нела Витошевиќ. Во улогата на Јана ќе настапи Марија Спиркоска-Илијоска, улогата на Змејот ќе ја толкува Зоран Ивановски, композитор на музиката е Огнен Анастасовски, сценограф Константин Трпеновски, додека автор на костимите е Розе Трајчевска. (К.Б.)