Поглед

Фејсбук како огласна табла

Даниела Трпчевска

Најпосетената мрежа Фејсбук стана како огласна табла на која не само што се „залепуваат“ најразлични пораки и мисли, туку и во секунда можат да се дознаат важни информации. Но, колку што социјалните мрежи привлекуваат се поголем број млади луѓе желни за дружба и нови познанства, тие се' почесто стануваат и една огромна сцена, на која во улога на главни актери се појавуваат суицидни или агресивни личности кои се обидуваат да го свртат вниманието на публиката.

Ако до скоро беше незамисливо да се вклучите на скајп и од другата страна да бидете сведоци на самоубиство кое се одвива пред вашите очи – тоа колку и да звучи бизарно, сега стана реалност во светот. Ако до скоро беше невозможно да се навлезе во умот на еден извршител на убиство и да се сфати зошто посегнал по нож - сега на Фејсбук и тоа стана возможно. Медиумите веќе не чепкаат по полициските фајлови за истрагата, бидејќи на интернет имаат речиси се'...Профилите од социјалните мрежи на неколкумина осомничени за убиство во земјава изминативе месеци беа главен извор за новинарските теми. Медиумите наместо по обдукциските протоколи чепкаа по фотографиите, постовите и разговорите на ФБ со цел да одгатнат дали нешто можело да го навести злосторот кој се случил.

Кога полицијата пред неколку години најави дека поинтензивно ќе ги следи социјалните мрежи и разговорите со цел да разоткрие случаи на педофилија и криминал, наиде на остра осуда дека навлегува во приватноста на корисниците. Но, грозоморните убиства кои извршителите или ги најавувале пред да ги извршат на своите профили на социјалните мрежи, или за нив пишувале откако ќе посегнеле по животот на својата жртва, го докажуваат сосема спротивното. Интернетот колку што е корисен, толку е и опасно место за игра.