Аврамопулос брифирал за спорот со името

Атина - Шефот на грчката дипломатија Димитрис Аврамопулос ја брифираше партијата Демократска левица за актуелните прашања во грчката надворешна политика. Како што истакна Марија Јанакаки, пратеничка задолженa за надворешна политика во Демократска левица, партијата која е дел од владината коалиција за спас на државата, со Аврамопулос разговарале за отворените прашања на грчката дипломатија. Фокус бил ставен на иднината на државите од Западен Балкан, кипарското прашање и односите со Турција. Во врска со македонско-грчкиот спор за името, Аврамопулос го повторил ставот кажан од пред две недели на расправата за доверба на владата. Тогаш Аврамопулос истакна дека очекуваат менување на реториката на македонската влада и се надеваат дека во Македонија ќе преовлада здравиот разум за побрзо да се најде решение за името. Новиот шеф на грчката дипломатија дополнитело забележа дека прашањето за името не е само поради разлика меѓу двете страни во врска со историски настани и симболи туку и прашање за почитување на меѓународното право.

Ставот на Демократска левица е во рамки на грчката црвена линија, односно име со географска одредница. Лидерот на партијата, Фотис Кувелис во интервју за грчките медиуми истакна дека се согласува со грчката стратегија за име со географска одредница, а на новинарско прашање дали би бил согласен со предлог Северна Македонија одговори потврдно, потенцирајќи дека едно такво име не претставува никакво отстапување од грчката историја. Голем дел од експертите велат дека токму Демократска левица ќе држи баланс во новата влада за македонското прашање. (М.П.)