Бучковски немал намера да прави партија

Владо Б��чковски, поранешен премиер и лидер на СДСМ, ги отфрла шпекулациите што се вртат во јавноста дека работи на формирање нова партија која на следните избори би и' била конкуренција на опозициската левица, со чие раководство тој од поодамна не е во добри односи.

„Немам намера да формирам партија“, ни изјави Бучковски вчера.

Тој и натаму се залага за непосредни внатрепартиски избори. Но, потенцира дека преферира битката, како што вели, за демократизација на СДСМ да ја води во рамки на партијата.

„Решен сум да ја почекам разврската од локалните избори. Потоа следува конгресот на СДСМ и тоа прашање повторно ќе се отвори. Мислам дека во текот на номинацијата на кандидатите за градоначалници од СДСМ ќе се уочи дека непосредните избори можат само да и' донесат бенефит на партијата“, вели Бучковски.

Поранешниот партиски лидер вели и дека тој лично не планира да излезе со кандидатски листи, иако не ја исклучува можноста на претстојните локални избори да има повеќе независни кандидати за градоначалници и за советници. „Бидејќи станува збор за избори на локални ниво, во сите досегашни циклуси имало многу независни кандидати за градоначалници и советнички листи. И сега има неколку случаи во кои мнозинството во Советот зависи од независни советници. Јас не можам да спречам никого да се кандидира“, вели Бучковски.

Забележливо е, вели тој, дека сега има зголемена активност кај опозицијата. Друга работа е, додава, дали е најсреќно избран терминот за овие активности - среде лето и во ек на Европското првенство во фудбал, кога граѓаните имаат други преокупации. „Се чувствува опозициско расположение во јавноста. Само прашање е како СДСМ ќе го искористи тоа“, вели Бучковски и додава дека за локалните избори е поважно каков ќе биде изборот на кандидати за градоначалници отколку што ќе каже партискиот лидер. (А.М.М.)