Опозицијата веќе не спие - дома

СДСМ реши да го смени имиџот на салонска партија, кој не и' донесе резултати во изминатиот период. Ефектите од новата теренска кампања ќе се видат на следните избори

Александра М. Митевска



Лидерот на СДСМ, Бранко Црвенковски, излезе претпладне од климатизираните простории во партискиот штаб и влезе во автобусот што требаше да го однесе до браната „Козјак“, каде што му се препушти на врелото сонце, гласно потсетувајќи на првите години од неговото владеење, кога почна изградбата на хидроелектраната. На „Бихаќска“ го остави имиџот на лидер кој се вратил во партијата по пет години престој на врвот на државата и кој преферира да ги влече потезите од кабинетот на вториот кат во партиската зграда, додека политички противници од власта до детали го анализираат неговиот минат труд во политиката.

Турнејата од „Бихаќска“ до „Козјак“ што ја приреди СДСМ деновиве во паузата меѓу два протестни митинга - проследени со промоција на опозициските кандидати за градоначалници и со престој на партиските функционери во куќи на мештаните (додека дел од Владата на чело со премиерот Никола Груевски бара инвеститори во странство) покажува дека опозицијата почна да практикува нов стил на политичка кампања. Откако Црвенковски објави дека битката преку институциите не дала резултати и дека отсега ќе практикува улична демократија, впечаток е дека опозицијата ја напушта дефанзивната тактика и влегува во офанзива против власта.

Универзитетскиот професор Ѓорѓи Спасов, поранешен генерален секретар на СДСМ, очекува позитивни ефекти од новата кампања во која влезе опозицијата. Според него, позитивно е тоа што СДСМ реши навреме да ги избере своите кандидати за градоначалници и што го пр��ви тоа преку нивна јавна промоција, на митинзи во градовите. Со тоа, вели, на кандидатите им се остава простор да ги формираат своите тимови и да и' ги претстават на јавноста, а истовремено се напушта принципот да се чека до последен момент за откривање на изборните адути.

„Втората добра работа е тоа што СДСМ, со ваков пристап, ја диктира агендата на медиумите. Партијата го сфати она што долго време и' се сугерираше - дека за да бидеш вест, треба да организираш настан“, анализира Спасов.

Тој посочува дека опозициските настапи во последно време, всушност, претставуваат нов и поефективен начин за држење на старите прес-конференции, кои веќе станаа здодевни. Сега, објаснува Спасов, тоа се прави на митинзи, што е многу повпечатлив начин за привлекување на вниманието. Спасов дополнува дека пораките што се испраќаат од плоштадите треба да се надополнат со предлог-мерки за подобрување на животот на граѓаните и да се демонстрира капацитет за исполнување на ветувањата.

СДСМ планира да го одржи истото темпо до 2 септември, за кога е најавен голем митинг во Скопје. Од партијата се' уште не откриваат како потоа ќе ја водат кампањата, во ситуација кога речиси сите ресурси на власта и натаму се во рацете на ВМРО-ДПМНЕ . Само најавуваат уште понагласено дејствување во шесте месеци што ќе преостанат до локалните избори, кои ќе бидат најдобар показател дали опозицијата ја избрала вистинската стратегија. Во сдсмовскиот штаб се разгледува и опцијата за нови предвремени парламентарни избори, иако од партијата велат дека евентуалната одлука за распуштање на парламентот не зависи од нив, туку од владејачките партии.

Комуникологот Петар Арсовски вели дека новиот стил на политичка битка што го промовира опозицијата е спротивен на досегашната практика партиите да комуницираа меѓу себе наместо со граѓаните. „Мислам дека комуникацијата со граѓаните ќе и' донесе добивка на опозицијата. Граѓаните сакаат да бидат во близина на политичарите, да ги видат на дело и да ги слушнат на самото место“, вели Арсовски и го посочува примерот со поранешната британска премиерка Маргарет Тачер, која во функција на кампањата, се сликаше како вози тенк.

Досега, додава Арсовски, ВМРО-ДПМНЕ го носеше ореолот на партија која е поблиска до народот. Сега, според него, СДСМ им го презема просторот и оттаму потекнува нервозата во владејачката партија. „Во последните неколку недели СДСМ одржа сто конференции на кои презентираше мерки и предлози, а ВМРО-ДПМНЕ имаше исто толку прес-конференции посветени на СДСМ. Така, владејачката партија влегува во стапица да комуницира само со противничката партија“, вели Арсовски.