Според Кацин, Груевски се договорил за името, па одложил

Кацин тврди дека решението на спорот постојано се жртвува заради некои избори во Македонија

„Не е реално да се очекува Македонија да почне преговори со ЕУ за приклучување, а притоа да не е решен спорот за името“, оценил за Дојче веле европратеникот Јелко Кацин. Тој тврди дека поранешниот грчки премиер Јоргос Папандреу правел чекори за да се договорат дел од работите, но Груевски го одложил договорот. Според него, поранешниот грчки премиер Јоргос Папандреу ги извршуваше и функцијата премиер и министер за надворешни работи за да преземе дел од тежината и да помогне во наоѓање компромис за името.

„Се' беше направено во Грција за да се договорат некои работи, но македонскиот премиер Никола Груевски го одложи договорот, бидејќи сакаше да се појави на внатрешни избори. А по изборите, повторно одложи за половина година. Резултатот на тоа е - Македонија се' уште е надвор од НАТО и без датум за преговори со ЕУ“, изјавил Кацин. Тој притоа не верува во можноста за почеток на преговори на ЕУ со Македонија паралелно со решавање на прашањето за името.

„Тоа може да го замислам јас и Македонците, но тоа не држи вода. Се' додека нема договор со Грција, тоа нема да биде можно и сето она што не е можно е нереално. Потребно е создавање реални предуслови за пробив. Ако Македонија продолжи со досегашниот пристап, а Филип Втори Македонски не е вистинскиот пристап, тоа не води кон пресврт и создавање подобра клима и предуслови за меѓусебна доверба“, изјавил Кацин.

Кацин, кој е известувач за Србија во Европскиот парламент, оценува дека кризата во која се наоѓа Грција и, воопшто, кризата во ЕУ ќе се одрази на динамиката на реализацијата на проширувањето на ЕУ кон земјите од Западен Балкан.

Во Европскиот парламент, според него, се посакува создавање поголема динамика и еден вид домино-ефект за земјите од Западен Балкан. „Затоа овде се занимаваме со оние што можат да бидат предводници - пионери и кои можат да ги повлечат другите со себе. Затоа во средиштето на нашиот интерес е Црна Гора, која на крајот од месецов може да започне преговори за членство во ЕУ, со што таа ја презема штафетата до Хрватска“.

Кацин, притоа, објаснува дека кога се гледа од перспективата на Стразбур и Брисел, многу е значајно да се има некоја земја од Западен Балкан која преговара. (Н.Р.)