Патот до Индија - очај или визионерство

Тимот на Груевски вчера од Њу Делхи го започна походот по инвестиции во Индија и во Малезија. Груевски ги повика индиските бизнисмени да ја посетат Македонија и да инвестираат

Маја Томиќ


По многуте роуд-шоуа на Владата во изминатите неколку месеци низ повеќе европски земји, како и Турција, Сингапур и Јапонија, на дневен ред дојдоа и далечните Индија и Малезија. Од завчера тимот на премиерот Никола Груевски е во потрага по инвеститори во овие две далечни земји. Вчера во Њу Делхи Груевски упати повик до индиските бизнисмени да ја посетат Македонија и да ги искористат сите предности за инвестирање. Како и досега, тој им вети максимална поддршка од институциите и деловна соработка со македонски компании, а потсети и на веќе присутните индиски инвестиции во земјава.

„’Митал стил’, ’Самвардана Мадерсон груп‘ и ’Бинани групацијата‘ се индиски инвестиции во Македонија кои имаат одлични искуства во водењето бизнис“, изјави Груевски на бизнис-форумот во Њу Делхи, организиран од Конфедерацијата на индиската индустрија, Асоцијацијата на стопански комори на Индија и Федерацијата на стопанските комори за трговија и индустрија, на која присуствуваа над 100 индиски компании. Премиерот ги запознал бизнисмените со даночните реформите, со економските показатели и макроекономските резултати. Министерот за финансии Зоран Ставрески, пак, зборувал за зголемувањето на конкурентноста на економијата, за фискалната политика, регулаторната гилотина и можностите за инвестиции во инфраструктурата и енергетскиот сектор. Министерот за странски инвестиции Бил Павлески и директорот на Дирекцијата за ТИРЗ, Виктор Мизо, во детали ги запознале индиските бизнисмени со деловното опкружување и нашите предности за инвестирање, а биле остварени и директни средби со некои индиски компании. Било споменато и дека индиската економија во изминатите две децении се зголемила за 20 пати, а за два пати е поголемо учеството на извозот на стоки, како и на извозот на капитал.

Освен во Њу Делхи, Владата ќе лови инвеститори и во Бомбај и Пуне, како и во Куала Лумпур во Малезија. Пуне е центар на автомобилската индустрија, ��а која Македонија досега изгледа најпривлечна за инвестирање, ако се имаат предвид постојните компании, американската „Џонсон контролс“ и британската „Џонсон Мети“, како и очекувањето на стартот на италијанската „Технохозе“, американската „Кемет електроникс“ и на индиската „Мадерсан груп“. Сите тие во зоната „Бунарџик“ ќе произведуваат разни делови за потребите на автомобилската индустрија.

Според неодманешната изјава на Мизо за „Утрински“, на средбите во Индија и во Малезија ќе се разговара со компании кои се веќе присутни на европскиот пазар, а бараат локации за доработка на своите производи и нивни пласман на европскиот пазар.

Какви ќе бидат конкретните ефекти и колку инвестиции навистина ќе дојдат во земјава, останува допрва да се види. Според податоците од Народна банка на Македонија, лани во земјава влегле речиси 300 милиони евра странски инвестиции, што е подобрување во однос на претходните две години, но се' уште недоволно за да се крене позначајно економскиот раст и да се намалат високата невработеност.

Поделени се мислењата за ефектите од владините роуд-шоуа.

Според Владо Бучковски, поранешен премиер, мала држава како што е Македонија нема потреба да троши толку пари за економски промотори, кога претставници на големи компании од големи земји имаат можност да се сретнат лично со премиерот.

„Основани се аргументите дека во време кога Европа се соочува со должничка криза, ние, во поглед на инвестирањето, треба да се свртиме кон новите економски џинови, меѓу кои е Индија. Не сум за тоа од старт да се критикува. Информациите говорат дека роуд-шоуто во Турција било успешно. Да почекаме да видиме какви ќе бидат ефектите од ова патување, бидејќи искуствата покажуваат дека од моментот кога ќе ги заинтригирате потенцијалните инвеститори до реализацијата на одредена инвестиција треба да поминат од 15 до 18 месеци“, вели Бучковски.

Поранешниот министер за финансии Џевдет Хајредини, пак, смета дека патувањата на Владата се смешна работа. „Ми личи како Владата да е пред избори и како да сака да го прошета светот и да посети повеќе егзотични места. Кој може да верува дека инвеститори од Индија ќе дојдат во Македонија. На големите индиски компании Балканот им е мал, а не Македонија.

Нема ништо посебно што да им понудиме, ниту поевтина работна сила. Проблемот е во тоа што Владата троши пари на граѓаните за шетање низ светот. Ако некој сака да инвестира кај нас, не мора лично премиерот да го информира за поволностите, тоа може сам да го дознае. Доколку имаше нешто сериозно, однапред ќе се кажеа имињата на компаниите“, вели Хајредини.

Средба со премиерот Манмохан Синг

Премиерите на Македонија и на Индија, Никола Груевски и Манмохан Синг, оценија во Њу Делхи дека двете земји имаат одлични политички релации и заемна соработка во рамките на ОН.

„Индија веќе подолг период ја именува Македонија под уставното име во билатералните односи. Имаме склучено договор за заштита на инвестициите, а сега инициравме и склучување договор за избегнување на двојното оданочување“, изјави премиерот Груевски по средбата со својот индиски колега.

Средбата, посочи тој, била комбинација од политички и економски теми. Станало збор за повеќе теми од меѓународната политика, но и теми поврзани со Македонија и со состојбите во Индија.