Продолжено време за наплата на зонските паркинзи

Од петок на зонските паркиралишта на „Градски паркинг“ ќе се наплаќа и по 21 часот во работни денови, односно по 14 часот во сабота. Од претпријатието објаснуваат дека продолженото време за наплата на паркинзите е утврдено со ценовник што важи во летен период и стартува од 1 јуни, а важи до 1 октомври. Бесплатно паркирање и натаму ќе има во недела и на државни празници.

„Оваа одлука ја донесовме по барање на граѓаните. Одлучивме да го продолжиме времето за да се избегне гужвата, бидејќи во лето навечер се создава поголем метеж. Се продолжува и наплатата во саботите, оти за викенди има голема раздвиженост во центарот на градот“, објаснуваат од „Градски паркинг“.

Инаку, цените остануваат исти. За паркирање во прва зона се наплаќа 45 денари од час, а дозволено е задржување само два часа. Во втората зона дозволено паркирање е четири часа, а цената е 35 денари од час. Во третата зона, пак, нема ограничено време на задржување и се наплаќа 25 денари од час. (Дс.Т.)