Брисел немоќен пред Груевски

Каде Филе го виде моментумот во реформите, не е јасно по заклучоците донесени од Брисел

Слободанка Јовановска

Еврокомесарот за проширување, Штефан Филе, не сакаше јасно да одговори во Брисел има или нема реформи во Македонија, а таа слабост ја прочитаа премиерот и министрите во Владата, давајќи вчера изјави колку се охрабрени од успесите што ги постигнуваат и признанијата што за тоа ги добиваат официјално од Унијата. „Добивме висока и позитивна оцена за реформскиот процес“, тврдеше шефот на дипломатијата, Антонио Милошоски, а премиерот беше уште попрецизен:

„Македонија завчера од Брисел доби многу позитивни мислења и неколку помалку позитивни работи, така што ние сме охрабрени и ова го гледаме како валоризација на нашиот труд и на сите што беа вклучени во реформите. Ме радува оцената и таа на некој начин е негација на она што цело време го тврдеше опозицијата“, триумфираше вчера премиерот.

Вистината е дека реформите одеа и се' уште одат назад, освен ако не се сметаат за реформи примањата во постојан работен однос на партиските членови во администрацијата, бркањето судии од работа, апсењето граѓани под фабрикувани обвинувања, постојаните кавги и најниското ниво на политичка комуникација во парламентот и вчерашните бркања на осуммина новинари што биле на список на неподобни за Владата. Каде виде моментум Филе и кои се тие реформи што ние никако да ги видиме во Македонија?

Она што се случи, всушност, на Советот за стабилизација и асоцијација беше демонстрација на немоќта на Брисел пред премиерот Никола Груевски и Владата на ВМРО-ДПМНЕ. Иако во заклучоците беа наведени сите негативни случувања на кои ни забележуваат во Комисијата веќе подолг период, во изјавите доминираше мека реторика и претпазливост, веројатно за да не се затвори вратата на комуникација со Македонија. Во Брисел одамна владее уверувањето дека Груевски едвај чека да го критикуваат за да има изговор да не ги спроведе реформите, како што веруваат дека го користи спорот за името додека дава уверувања оти бара решение.

Во заклучоците што беа објавени по состанокот, всушност, позитивни работи немаше, освен ако не се сметаат набројувањата на некои закони кои се донесени, но прашање е колку и како се спроведуваат. Во нив се „забележува“ создавањето на анкетната комисија за инцидентот во парламентот, па по логиката на премиерот тоа треба да е голем успех во политичкиот дијалог, што откако предизвикаа скандал, партиите се согласиле дека треба да го истражат дополнително.

„Најдобар начин да се подобри климата во земјата е да се имплементира Законот за Собранието и да се одобри Деловникот“, се наведува во документот, во кој дополнително е вметната и забелешката дека на претставниците на ЕУ им било речено од страна на нашите министри дека се решени да го одржат моментумот на реформите во земјата и оти тоа им била суштинска цел.

Притоа, три клучни збора се провлекуваат зад секоја сериозна критика, кои имаат таква тежина што политичкиот дијалог како политички критериум го прават детска играчка, бидејќи ставаат голем прашалник на демократијата во државата. Тоа се независност, транспарентност и непристрасност, кои врзани со состојбите во судството, борбата против корупцијата и јавната администрација во Македонија станаа зависност, нетранспарентност и пристрасност. „Советот ги забележа континуираните напори за судски реформи, вклучувајќи ги предвидените законски измени, кои натаму ќе ја зајакнат неговата автономија, независност, ефективност и професионализам.

Во овој поглед ЕУ посочува дека од голема важност е да се осигури независност и непристрасност на судиите и јавните обвинители“, се наведува во ублажената верзија на документот. „Во однос на корупцијата се потребни политичка непристрасност и имплементирање на законските одредби за финансирање на политичките партии, како и проверка на декларациите за имот и можниот конфликт на интереси“, стои натаму. Брисел повторно побара професионална, транспарентна и независна јавна администрација, а одговорноста за лошиот политички дијалог ја подели на власта и на опозицијата.

Инаку, според оцената на Филе, по добивањето позитивен извештај во 2009 година Македонија малку забавила со реформите, но сега повторно се чувствувало враќање на темпото и нов моментум, па Европската комисија нема да ја смени препораката за преговори од минатата година. Сепак, на прашањето кога Македонија може да добие датум за преговори, одговорот беше дека ЕУ не е зависник од календари, туку од стандарди и исполнети услови, па одлуката ќе дојде кога ќе се испорачаат резултати. Од каде им е, пак, оптимизмот дека спорот за името ќе се реши, беше прашање на кое белгискиот шеф на дипломатијата имаше оригинално објаснување.

Според него, затоа што тоа е рационално и го чекаат сите. Тоа е како зрело јаболко, кое еден ден мора да падне, додаде тој. Охрабрен од ваквите описи и министерот Милошоски извади бисер, според кој, географијата, а не нашата политика ни е виновна што се' уште немаме преговори како Исланд, бидејќи немаме добар сосед. (С.Ј.)