12.04.2012, 17:54 Папуљас до Иванов: Грција сака фер решение за името
Во писмото, испратено како благодарност за честитката од Иванов по повод Националниот ден на Грција, Папуљас вели дека решението ќе ги засили билатералните односи
Грција останува целосно посветена на изнаоѓањето фер и одржливо решение за прашањето за името преку преговорите под покровителство на Обединетите Нации, вели претседателот на Грција Каролос Папуљас во писмо до претседателот Ѓорѓе Иванов.
Во писмото, испратено како благодарност за честитката од Иванов по повод Националниот ден на Грција, Папуљас вели дека решението ќе ги засили билатералните односи.
„Конечното решавање на ова прашање ќе ни овозможи да го искористиме големиот потенцијал на нашите билатерални односи и ќе придонесе значително во консолидирањето на безбедноста, стабилноста, добрососедските односи и развојот на нашиот регион, особено преку европската перспектива на Западен Балкан“, пишува Папуљас.
Воедно грчкиот претседател испраќа и благодарност.
„Би сакал да ја изразам својата искрена благодарност за честитката упатена по повод Националниот ден на Грција, како и за Вашите желби упатени до грчкиот народ“, вели Папуљас.
|
