12.04.2012, 12:38 Пешевски: Владата ќе процени кога да интервенира во цената на бензините
Македонија нема да го следи примерот на некои земји, како Хрватска, кои ги зголемија даноците.
Владата ќе интервенира во однос на цената на бензините тогаш кога ќе процени дека е тоа потребно, изјави денеска вицепремиерот за економски прашања Владимир Пешевски.
Според него, кон ова прашање се пристапува многу сериозно и аналитично.
- Владата нема волшебно стапче да ги смени цените на нафтата на светскиот пазар. Тој тренд е таков каков што е. Се додека е растечки, цената на нафата генерално ќе се зголемува, рече Пешевски, одговорајќи на новинарско прашање на прес-конференцијата по повод Предлог законот за туристички развојни зони.
Македонија нема да го следи примерот на некои земји, како Хрватска, кои ги зголемија даноците.
- Она што во тој случај беше сигурно е дека ќе се зголеми ДДВ-то, а тоа што можеби ќе се случи беше дека ќе се намали цената на бензинот. Кај нас е обратно, сигурно нема да се зголеми ДДВ-то, но можеби ќе има корекција во делот на давачките кон државата, потенцира вицепремиерот.
Тој најави дека Владата наскоро ќе излезе и со решенија околу царинските давачки за увоз на благородни метали кои им се потребни на дел од фабриките во „Бунарџик“.
- Се работи на изнаоѓање решенија. Веруваме дека во скоро време ќе ги најдеме и соодветно ќе делуваме, рече Пешевски.
|
