Атлетико мисли само на победа против Реал

Напаѓачот на Атлетико, Фалкао, пред вечерашното градско дерби со „кралевите“ пука од самодоверба

Реал Мадрид вечерва му гостува на својот градски ривал Атлетико, каде што играчите на Жозе Мурињо ќе бидат под притисок за освојување три бода, бидејќи Барселона во случај на победа вчера над Гетафе ќе им се доближи на само еден бод.

Но напаѓачот на Атлетико, Фалкао, ќе се потруди неговиот тим да им ги помати сметките на „кралевите“.

„Размислуваме само за победа, не се заморуваме со тоа што би значел поразот за Реал. Сконцентрирани сме на себе и на шансата да ги победиме на нашиот стадион. Мора да останеме смирени“, изјави напаѓачот на Атлетико, 26- годишниот Колумбиец.

Тој редовно забива за „црвено-белите“ сезонава, а се надева дека ќе ја затресе мрежата и против лутите противници.

„Тоа би било посебно чувство, а тие што ги постигнуваат ја пишуваат историјата. ��е надевам дека ќе победиме, а би било феноменално кога би забил“, оптимистички зборуваше Фалкао.

Бившиот играч на Порто ја нагласи и најголемата предност на противникот: „Реал има одлични поединци, кои може да го решат натпреварот, но силни се и како тим. Над се', се истакнува индивидуалниот квалитет на фудбалерите“, кажа колумбискиот репрезентативец, кој сезонава постигна 20 гола и го дели третото место на листата на најдобри стрелци во првенството со Гонзало Игуаин.