Груевски и' даде морална поддршка на Јанкулоска

Премиерот го посети Министерството за внатрешни работи за да се распраша до каде е истрагата за злосторството. Извршена е реконструкција на убиството и се проверуваат информации, изјави министерката за внатрешни работи

Полицијата бара трпение и време за да го расчисти бруталното убиство кај Смилковското езеро во Скопје. Извршена е реконструкција на убиството, се проверуваат информации, се анализираат досегашните сознанија, се бараат нови докази, кои ќе помогнат во расчистување на злосторството што ја потресе земјава. Како шпекулации што не и' помагаат на истрагата, беа оценети шпекулациите дека петкратните убијци се веќе фатени или, пак, се во пребегнати во соседни земји, според министерката за внатрешни работи Гордана Јанкулоска, можат само да и' одат на штета на истрагата.

Премиерот Никола Груевски имаше повеќечасовна средба со врвот на МВР со цел да се информира од прва рака за досегашниот тек на истрагата и сознанијата со кои располага специјалниот тим кој беше формиран за да го расветли овој грозоморен чин. По средбата, премиерот не даде изјава за медиумите, но министерката за внатрешни работи Гордана Јанкулоска ги брифираше медиумите за новите сознанија, но и апелираше да запрат шпекулациите дека истрагата е при крај.

„Секој ден има по некој детаљ што и' помага на истрагата, но во интерес на нејзино завршување, се' уште не можеме да ја информираме јавноста“, рече вчера Јанкулоска. Таа уште еднаш соопшти дека истрагата оди добро, но побара воздржаност од медиумите, бидејќи објавувањето сензационални вести не одат во прилог на работењето на полицијата. Таа повтори дека станува збор за најобемна оперативна акција, во која учествуваат најобучените полициски инспектори, поради што е потребно време да се пронајдат убијците и нивните наредбодавци. Досега се обработени мал дел од информациите со кои располага полицијата. Не се отфрлаат ниту најтривијалните претпоставки и шпекулации. Се анализираа и заканите на „Армија за ослободување на окупираните албански земји“, која побара „повлекување од окупираните и колонизирани албански земји“ или во спротивно, ќе ги нападнеле „славомакедонските полициски и воени структури“.

„Станува збор за организација што и' претходно испраќала такви закани кон соседни држави. Дел од нив се покажаа неточни, но нема да ги отфрлиме, туку ќе ги следиме и во иднина“, изјави Јанкулоска.

Претседателот на Владата околу 2,5 часа се задржа во зградата на МВР, а за тоа време новинарите беа оставени да чекаат. Веќе проструија гласишта дека убијците се фатени и дека токму затоа државниот врв е повикан на средба.

„Се' уште немаме сознанија за идентитетот на сторителите. Одредени информација, кои се појавија во јавноста, не се поткрепени со докази и го оценуваме како провокација со цел да се изнуди информација, која би одела во штета на истрагата. Нашиот фокус не може да биде јавна полемика со сето она што се појавува на социјалните мрежи“, истакна министерката.

Крвавото убиство во близина на Радишани се случи минатиот четврток. Застрелани беа четири момчиња на возраст од 18 до 21 година, како и еден 45-годишен маж, за кој се верува дека бил сведок на злосторството. (Г.А.)