Загрижувачки пораст на самоубиствата

Момче скокна од зграда во Скопје. Виничанец три пати во иста вечер се обидел да се самоубие, четвртиот обид бил кобен

За само два дена згаснаа два млади живота по извршени самоубиства. Со скок од зграда на улицата „Братфордска“ вчераутро 18-годишниот Ј.К. од Скопје си го одзел животот. Само еден ден претходно во Виница, 34-годишен маж по три неуспешни обиди, четвртиот пат успеал да го оконча животот. Пред само неколку дена, во скопската населба Козле, 21-годишна студентка се фрли од покривот на зградата. Мотивите за самоубиствата се' уште се непознати, но бројките покажуваат алармантен пораст на млади луѓе кои одлучиле да посегнат по сопствениот живот.

Последниот случај во полицискиот билтен беше евидентиран вчераутро околу 10,30 часот. Осумнаесетгодишното момче се фрлило од зградата во која живеело во скопската населба Капиштец.

Момчето паднало врз покривната конструкција на хотелот „Гранит“ и веднаш починало. На местото на настанот екипи од СВР - Скопје извршија увид во присуство на јавен обвинител и истражен судија. Соседите вознемирени од смртта на младото момче велат дека не знаат што го натерало да посегне по сопствениот живот и да го оконча на ваков трагичен начин.

Еден ден претходно, трагично заврши и животот на 34-годишниот виничанец О.Ѓ. Тој во само една вечер трипати се обидувал да си го одземе животот.

„Најпрво си ги исекол вените со жилет, потоа се удрил по челото со тапиот дел од секира, но не успеал да се самоубие. Третиот пат се качил во помошна просторија од куќата и се обидел да се обеси со електричен кабел, но кабелот се скинал“, велат од полицијата. При четвртиот обид, тој зел пластично црево за вода и се обесил. Полицијата извршила увид на самото место и по наредба на истражен судија телото е предадено на семејството. Мотивите за двете самоубиства се' уште се непознати.

Статистиката вели дека само во изминатите неколку дена се регистрирани пет самоубиства, но она што загрижува е драстичниот пораст на бројот на самоубиства во однос на минатата година. Анализите покажуваат дека зголемениот број самоубиства не се однесуваат само на главниот град, туку и на другите градови во државава. Кочани е рекордер по самоубиства во источниот дел на земјава. Евиденцијата на кочанската полиција говори дека во изминатиот месец се случиле 15 самоубиства во градот и во околината, а дека во целиот источен регион имало 35 самоубиства. (Љ.С.)