26.10.2012, 14:55 Дијаспората ќе вади пасоши во македонските дипломатски претставништва
Македонските иселеници ќе имаат можност своите пасоши да ги извадат без да патуваат во Македонија, откако Владата донесе одлука мобилни станици на МВР со опрема за изработување биометриски пасоши во одреден временски интервал да бидат на располагање во дипломатско-конзуларните претставништва каде има поголеми македонски заедници.
Претседателот на Владата Никола Груевски денеска одговарајќи на прашање на пратеникот Милорад Додовски, рече дека наскоро во сите позначајни весници ќе бидат објавени информации со конкретни датуми и месеци во кои дипломатски претставништва на одреден период ќе биде лоцирана опремата за добивање пасоши.
- Некаде до крајот на годината ќе биде објавена јавна информација и сите однапред ќе знаат во кој период во кој град односно дипломатско-претставиштво ќе биде опремата за да може да си планираат, изјави премиерот, најавувајќи дека наскоро ќе бидат објавени детали за активностите.
Се размислува, додаде тој, за купување дополнителна опрема, но за тоа се уште нема донесено одлука.
- Со оваа опрема што ја имаме и со мобилните станици на МВР може да се заврши голема работа, рече Груевски.
Владата, истакна премиерот, посветува сериозно внимание на македонската дијаспора. - Не случајно предложивме и на некој начин успеавме да издејствуваме македонската дијаспора да добие право на глас на парламентарни и претседателски избори. Веруваме дека дијаспората треба да го има тоа право и дека заслужува да учетсвува во севкупниот политички и општествен живот во Македонија, изјави премиерот.
|
