Предлогот на Николиќ ја раскара СПЦ

Епископот бачки Иринеј упати критика до епископот шабачки Лаврентиј поради неговата изјава дека СПЦ треба да и даде автокефалност на МПЦ

Еден од предводниците на најконзервативното крило во Српската православна црква, бачкиот епископ Иренеј Буловиќ, остро ја нападна изјавата на неговиот колега од шабачката епархија, Лаврентиј Трифуновиќ, во која беше изразен став дека Македонската православна црква треба да добие автокефалност.

Во продолжениот одек на изјавата на српскиот претседател Томислав Николиќ дека со евентуално ослободување на Јован Вранишковски може да се издејствува признавање на статусот на МПЦ, Буловиќ му се нафрли на Трифуновиќ оценувајќи дека шабачкиот владика дал „крајно непромислена, несериозна и црковно-канонски неприфатлива изјава“.

Понатаму, во навредлив тон, бачкиот епископ ја доведува во прашање и компетенцијата на Лаврентиј:

„Тој очигледно не чул за современиот, со сеправославен консензус формулиран став по ова прашање. Да научел барем нешто од ова, би знаел дека ниту една помесна црква сама не може да даде автокефалност, туку само да предложи сеправославно разгледување на евентуалното осамостојување на некои свои епархии“, пишува Иринеј, кој го прашува Лаврентиј „дали сите православни цркви се во заблуда кога солидарно со СПЦ не ја признаваат автокефалноста на МПЦ“.

Буловиќ притоа го премолчува фактот дека МПЦ веќе 45 години функционира како самостојна црква со организирана хиерархија (од осамостојувањето во рамките на суверена држава) и дека главниот проблем е сепак политички, односно во таканаречениот грчки блок цркви (со центри во Цариград, Атина, Кипар, Ерусалим, Александрија и Тирана), кој првенствено се противи на името Македонска православна црква.

Да не постоеше политичкиот проблем, СПЦ, на која и' е доделено решавањето на црковното прашање во Македонија, доколку дадеше зелено светло за признавање на автокефалниот статус на МПЦ, немаше да има никаков проблем и преостанатите православни цркви да го сторат истото.