25.10.2012, 13:29 Санкции за работодавците, благосостојба за работниците
За период од две години (2010 и 2011) имало 12 смртни случаи при работа, додека досега во 2012 година петмина повреди на работно место завршиле со смртни последици. Статистиката покажува намалување на бројот на колективните повреди, односно четири во 2010, два во 2011 и ниту еден регистриран случај во 2012 година. Но, сепак, се' уште има работодавци кои не применуваат заштитни мерки и треба да бидат санкционирани. Нужно е одржување на највисокото ниво на физичка, ментална и социјална благосостојба на работниците и сведување минимален ризик и подигнување на свеста на сите општествени фактори за безбедност�� и условите при работа.
Ваквите заклучоци и насоки произлегоа од денешните дискусии на Европската недела за безбедност и здравје при работа на која учествуваа претставници од Министерството за труд и социјална политика, Државниот инспекторат за труд, од Македонското и од Европското здружение за заштита при работа, трудови инспектори, како и луѓе од домашни и странски економски и стопански комори. Учесниците утврдија дека многу е подобро и поевтино да се превенираат несреќите при работа отколку да се трпат последиците од нив.
„Сите мерки што се преземаат во општеството доведуваат до воведување правила во играта. Мислам дека прав исчекор ќе направиме кога нашата свест и начинот на пристапување на работите ќе ги поставиме на малку повисоко ниво. Заштитата при работа не смее да се гледа само од страна на работниците, туку како сеопфатен процес кој е од полза и на работниците, но и на работодавците и на самата држава. Мора да се направи процена на ризикот, по што ќе се знае со кои превентивни мерки тој да се сведе во прифатливи рамки“, смета Милан Петковски, претседател на Македонското здружение за заштита при работа.
Министерот за труд и социјална политика, Спиро Ристовски, пак, најави дека во зимскиот период, за кога се предвидуваат екстремно ниски температури, ќе бидат преземени пакет-мерки и препораки, а ќе продолжат и засилените инспекциски надзори.
„Ќе има повеќе стратегиски документи и упатства за постапување во вонредни состојби. Не велам дека може се' да се превенира, но ќе се обидеме да ги намалиме ризиците на минимум. Без разлика кој е работодавец - дали приватна компанија, државата или општината, во зимскиот период нема да има селекција во надзорите за почитување на препораките и мерките“, најави Ристовски. (Б.Ш.)
|
