Пешевски и Самак најбогати од економските министри

Колкав имот по��едуваат министрите и дали според тоа се гледа и колку се добри економисти?

Соња Маџовска

Колкав имот поседуваат економските министри и дали според тоа се гледа и колку се добри домаќини, односно економисти?

„Утрински весник“ минатата недела ја истражуваше имотната состојба на министерот за финансии Зоран Ставрески, посебно станот што го има во богатиот кварт Чеви Чејс во Вашингтон. Провокација за текстот беше расправата по интерпелацијата за неговата работа. Првиот финансиер ја преживеа интерпелацијата, а во дебатата покрај бројки и факти се вадеа и стари работи, како што е онаа со станот на министерот за кој се знае, а и тој има наведено во анкетниот лист дека го има купено во 2002 година, кога извршуваше функција во Светска банка, а таму живееше со семејството.

Покрај Ставрески, уште еден министер има стан во Америка.

Министерот за странски инвестиции Веле Самак во анкетниот лист има наведено дека поседува трособниот стан вреден 500.000 долари во САД. Станот на министерот се наоѓа во Белви, во државата Вашингтон на Пацификот. Белви е, всушност, сателитски град на познатиот Сиетл и до пред економската криза во 2008 се сметал за центар на брзи промени и бил прогласен за едно од најдобрите места за живеење и за почнување бизнис во државата Вашингтон. Белви е рангиран како четврто најдобро место за живеење во Америка.

Министерот Самак во Македонија нема недвижен имот. Поседува возило „мерцедес“, според негова процена од 25.000 долари, акции во вредност од 20.457 евра, 200.000 долари во пензиски фонд, но пријавил и заем од 93.000 долари и кредит од 450.000 долари.

Неговиот колега, исто така, министер за привлекување странски инвестиции Бил Павлески, кој дојде лани да ја извршува оваа функција од Соединетите Американски Држави, нема имот во САД, но затоа поседува две куќи во земјава. Поконкретно, има куќа од 329 квадратни метри вредна 250.000 евра во Охрид, и уште една куќа од 202 квадрати, според негова процена од 150.000 евра во Трпејца. Вози „мустанг“ од 11.000 долари, има и акции вредни 550.000 долари, и сметка во странска и во една домашна банка.

За еден од најбогатите меѓу министрите слободно може да се прогласи вицепремиерот за економски прашања Владимир Пешевски и неговото семејство. Тој лично поседува земјиште во Визбегово, еден плац од 2.172 квадратни метри вреден 85.000 евра, и уште еден плац од 85 квадрати во износ од 7.000 евра. Пешевски има два плаца и во Долно Соње, еден од 9.424 квадратни метри од 66.000 евра, а другиот од 8.376 квадрати вреден 53.000 евра. Неговата сопруга има стан во Скопје од 119 квадрати проценет на 130.000 евра, гаража од 10.000 евра. Уште еден стан има сопругата на Пешевски од 48 квадратни метри во Скопје од 60.000 евра. Таа поседува исто така земјиште во Визбегово вредно 20.000 евра. Вицепремиерот нема сопствено возило, ама затоа неговата сопруга има два автомобила, „мицубиши“ и „тојота“. Поседува и накит вреден 15.000 евра и удели во компании, вредни 330.000 евра. Министерот побарува и средства за завршена работа во износ од 70.000 евра, како и бонус од 260.000 евра.

И имотот на министерот за транспорт и врски Миле Јанакиески и неговото семејство не е за потценување. Тој поседува стан во Скопје од 58 квадрати од 40.000 евра, куќа во Прилеп од 350 квадрати вредна 150.000 евра, а неговите родители имаат куќа и во Скопје од 180 квадрати од 250.000 евра. Има земјиште во Берово. Тој лично нема возило, а неговата сопруга вози „сеат леон“ од 15.000 евра. Два автомобили, пак, имаат неговите родители, „тојота ајго“ и уште еден „сеат леон“. Во неговиот анкетен лист уредно се наброени како сопствен имот и машки и женски часовник, но ја нема нивната вредност. Како личен имот министерот Јанакиески поседуваат акции и неколку штедни книшки.

Министерот за земјоделство Љупчо Димовски како личен имот во анкетниот лист навел дека поседува само уметнички дела и возило „форд фокус“ од 13.500 евра. Автомобил од марката „форд“ вози и неговата сопруга, но помал „фиеста“ од 9.600 евра. Димовски нема недвижен имот, во анкетниот лист стои дека стан поседуваат неговите родители во Скопје од 112 квадратни метри, вреден 112.000 евра.

Министерот, пак, за економија Ваљон Сараќини речиси ништо нема на свое име, се' што пријавил е на име на неговите родители. Тие поседуваат куќа од 294 квадратни метри од 200.000 евра во Скопје, куќа во Улцињ вредна 180.000 евра од 320 квадрати. И возилата во семејството Сараќини се водат на име на неговите родители. Имаат „сеат алтеа“ вреден 8.000 евра, и „опел кадет“, од 800 евра. Министерот за економија е единствениот што вредноста на имотот што го поседуваат неговите родители го пресметал во евра, останатите министри процените ги дале во денари.

Со оглед на тоа што за министерот за финансии Зоран Ставрески веќе пишувавме што поседува, за да не биде дека него го испуштаме во оваа наша листа за тоа колку економските министри се и добри домаќини, ќе потсетиме дека тој покрај станот во Вашингтон од 90 квадратни метри проценет на 200.000 долари, кој моментно го издава по цена од 1.800 долари, поседува уште еден стан во Охрид од 40 квадратни метри. Неговата сопруга, пак, има стан и куќа во Скопје. Министерот поседува и два автомобила, „хонда сивик“ од 2001 година, вреден 250.000 денари, и „варбург“ од 1991 година, за кој вредноста ја проценил на 25.000 денари. Ставрески поседува и неколку штедни денарски и девизни книшки во Шпаркасе банка и една во американска банка.