Банките да работат повеќе со фирмите, а помалку со Владата




Бизнисмените бараат кредитите од ЕИБ директно да ги пласира МБПР без посредство на банките.

Владата да го намали задолжувањето на домашниот пазар за да се ослободат повеќе средства што банките ќе ги пласираат кај домашните компании. Во спротивно, се нарушува односот меѓу банките и претпријатијата и на банките им се дава една сигурност дека е подобро да работат со Владата, отколку со фирмите. Кај нас банките наместо на компаниите повеќе и позајмуваат на Владата, наместо обратно. „Банките не треба да бидат толку комотни во собирање на средства од Владата, туку треба самите да излезат на надворешниот финансиски пазар и да набавуваат средства“, изјави Блерим Златку од Комората на северозападна Македонија на денешната заедничка прес конференција со министерот за финансии Зоран Ставрески и претседателите на Стопанската комора, Бранко Азески и на Сојузот на стопански комори, Златко Калеников.

„Ние ги поздравуваме мерките што ги носи Владата за подобрување на бизнис-климата и за јакнење на претпријатијата. Но, сепак, кредитната линија не е сјајна. Од поодамна бараме од Владата за овие и за другите средст��а кои доаѓаат во земјава од меѓународни институции, да се оспособи Македонската банка за поддршка на развојот да ги пласира парите без посредници, односно без деловните банки. На овој начин тие ќе бидат евтини и достапни, а ќе има и конкуренција меѓу банките.

Како и да е, кредитната линија од ЕИБ е за поздравување и се надевам дека средствата, кои не се голем износ, ќе се искористат и оти набргу ќе следи средната транша од 100 милиони“, рече Златку.

Според Златко Калеников од Сојузот на стопански комори на Македонија, повлекувањето на овие средства е добра антикризна мерка и бизнисмените се надеваат дека парите ќе бидат повлечени за еден до два месеца.

Денешниот прес беше свикан со цел да се промовира новата транша од кредитната линија на Европската инвестициона банка од 50 милиони евра за проекти за малите и средните претпријатија. Средствата ќе бидат дистрибуирани преку МБПР и комерцијалните банки со поволни услови. Каматната стапка ќе биде 5,5 проценти, а ќе бидат одобрувани два вида на инвестициски кредити за трајни обртни средства.

„Со ова Владата го исполни ветувањето дека ќе го реализира овој проект кој е еден од најзначајните во насока на поддршка на македонското стопанство со свежи финансиски средства добиени по извонредни услови. Користењето на 50 милиони евра е значајна во денешни услови кога во Европа кризата зазема се' поголеми размери и кога е извесно дека банкарскиот сектор се соочува со дополнителни ризици поради кои евидетно е дека пристапот до финансиски средства станува се потежок“, истакна Ставрески. (М.Т.)

Ставрески: Нема зголемување на даноците

„Не се размислува за зголемување на даноците или за воведување прогресивно оданочување, бидејќи тоа би однело многу претпријатија во пропаст“, изјави вчера министерот за финансии Зоран Ставрески. Тој потенцира дека во програмата на ВМРО-ДПМНЕ нема предвидено ниту зголемување на даноци, ниту воведување на прогресивно оданочување. „Сметаме дека тоа е лоша политика посебно во вакви околности кога во економијата во Европа и светот се случуваат кризни ситуации. Остануваме на тоа дека наспроти предизвиците кои ги имаме како земја, Македонија ќе остане со најниски даноци во Европа“, рече Ставрески.

Тоа, според него, се однесува и на придонесите за пензиско осигурување. „Во овој дел се размислува за мерки за подобрување на наплатата на придонесите и за заштеди во рамки на Фондот за пензиско и за инвалидско осигрување, како и во делот на контролата за тоа каде и кому му се исплаќаат пензии“, изјави Ставрески.