20.10.2011, 14:51 Собранието расправа за невработеноста и сиромаштијата
Собранието на Република Македонија во рамките на денешното продолжение на 11. седница расправа за Информацијата за алармантниот пораст на невработеноста и сиромаштијата во земјава, поднесена од пратениците од СДСМ, НСДП и ПЕИ. Расправата ќе продолжи и по редовната едночасовна пауза.
Цветанка Иванова од СДСМ посочи дека сиромаштијата и невработеноста се горливи проблеми со кои се соочува Македонија и додаде дека власта не сака да се справи со нив.
- Стапката на сиромашни луѓе изнесува 31,7 отсто или 637.000 граѓани, рече Иванова. Таа нагласи дека власта не се грижи за сиромашните граѓани и додаде дека од Буџетот за нив се оделени само 3,4 милиони евра, а за тениски терени, како што рече, се предвидени 7,4 милиони евра.
- Најзагрозени семејства во Македонија се семејствата со две деца, а тоа е најголемиот дел од нашите семејства, по нив следат земјоделците од кои 52,1 отсто се на удар на сиромаштијата, невработените со 42 отсто ... Само 5,8 отсто од вкупната бројка на граѓани може реално да си ги подмират трошоците, додека 42,8 отсто не можат да го направат тоа, рече Иванова и додаде дека во земјава има невработеност од над 31 отсто.
Обвини дека има масовно симнување од списоците на невработени и на корисници на социјална помош и додаде дека со актуелните политики не може да се пронајде излез од сиромаштијата.
Александар Спасеноски од ВМРО-ДПМНЕ во реплика одговори дека наспроти предизвиците со кои се соочува Македонија денес работите со борбата против сиромаштијата и невработеноста се многу подобри од минатото.
- Економската сутуација во Македонија е далеку од совршена, но е многу подобра од минатото, рече Спасеновски и потсети на зголемувањето на пензиите и на социјалните надоместоци за над 30 отсто, како и на платите за 20 отсто.
Во 1996 невработеноста, нагласи, беше цели 36 проценти, а денеска е 30,9 отсто и е најниска од осамостојувањето на земјава.
Неговиот сопартиец Илија Димовски во репликата истакна дека во последниве години ефективно се отворени 80.000 нови работни места и додаде дека се намалени даноците и стапките за придонеси, обезбедено бесплатно школство, воведен е рамен данок...
Косана Николиќ Мазнева од ВМРО-ДПМНЕ, пак, рече дека за да се зборува на темите за невработеноста и сиромаштијата во Македонија треба да се има кредибилитет и чисто минато и додаде дека токму во времето на СДСМ е направена, потенцира, најкриминалната приватизација и голем број граѓани се оставени на улица. вј/паг/14:20
|
