20.10.2011, 13:22 Продолжува штрајкот во Грција
Во Атина продолжува генералниот штрајк поради владините мерки за штедење, кои што вечерва ќе се најдат пред пратениците.
Двата синдикати на јавниот и приватниот сектор, денеска претпладне закажаа нов собир на плоштадот Синтагма пред зградата на Парламентот.
Приврзаниците на прокомунистичкиот Работнички фронт почнаа да се собираат во центарот на Атина уште во шест часот изутрината, скандирајќи „Не ја слушајте плутократијата, сите заедно до победа“.
Во текот на вчерашните протести во коишто, според податоците на полицијата, учествувале 70.000, а според тврдењата на организаторите 200.000 луѓе, дојде до жестоки судири меѓу група млади и полицијата. Младите демонстранти ги кршеа и ограбуваа продавниците во центарот на Атина.
Пред Парламентот демонстрантите фрлаа со парчиња мермер и молотови коктели кон полицајците, а полицијата возврати со шок бомби. Според податоците на полицијата, 14 полицајци биле префрлени во болница поради повреди.
Центарот на Атина и денеска е затворен за сообраќај, а зградата на Парламентот како и вчера ја обезбедуваат стотици полицајци во опрема за разбивање на демонстрациите и полициски марици. Јавниот превоз е потполно парализиран, а училиштата и продавниците не работат.
Новиот владин план за штедење кој што денеска ќе се најде пред пратениците, предвидува дополнително зголемување на даноците и намалување на платите, што е договорено и со ЕУ и ММФ во замена за одобрување на меѓународни заеми.
.
|
