19.10.2011, 14:10 Индија свечено ја отвори Ф1-патеката
Гран-при викендот на објектот вреден 400 милиони долари ќе го збогатат „Металика“ и Леди Гага
Индија ја пушти во употреба новата патека за Формула 1, вредна 400 милиони долари, ветувајќи дека ќе ги потисне разочарувачките спомени од минатогодишните Игри на Комонвелтот. Стравувањата дека патеката Буд, долга 5,14 километри и сместена близу Њу Делхи, нема да биде целосно подготвена исчезнаа по помпезната инаугурација на објектот. Игрите на Комонвелтот, кои требаше да ја промовираат Индија во растечка глобална сила, наместо тоа оставија спомени за недовршени објекти и за огромно натфрлање на буџетот.
„Игрите на Комонвелтот не натераа да ги наведнеме главите од срам“, изјави на прес-конференцијата Маноџ Гаур, претседател на приватниот промотор на трката „Џајпи груп“. „Ние му пристапивме на Ф1-проектот како на предизвик и решивме да направиме толку импресивна патека што срамот од Игрите на Комонвелтот ќе биде заборавен и ќе биде обновена нашата гордост во светот“.
Патеката е дел од амбициозниот спортски комплекс на 10.000 квадратни метри, кој ќе вклучува и академија за мотоспорт што треба да биде основана во соработка со „Мерцедес-Бенц“. Дизајнира��а од германскиот архитект Херман Тилке, патеката има најбрз правец во споредба со која и да е друга Ф1-патека во светот.
Индискиот возач на Формула 1, Нараин Картикејан, член на Хиспанија рејсинг тим, го испофали објектот.
„Имам возено на сите поголеми Ф1-патеки низ светот и оваа ја ценам за една од најдобрите“, изјави Картикејан, кој се надева дека ќе вози пред 100.000 навивачи, кои се очекува да присуствуваат викендот кога е трката. Фановите тогаш ќе имаат и друг вид забава, вклучувајќи ги и првиот настап во оваа земја на американската хевиметал група „Металика“ и поп-сензацијата Леди Гага.
„Се обидуваме трката да ја направиме единствено искуство за фановите“, изјави Гаур. „Таа е прашање на индискиот престиж во светот. Направивме обид да дадеме мал придонес за да се осигуриме дека оваа инвестиција е привлечна за сите“.
Гаур додаде дека влезниците за трката се речиси продадени, освен неколку корпоративни блок-карти по цена од 3,5 милиони рупии (70.000 долари) до 10 милиони рупии. Тој, исто така, ги негира заканите од некои локални групи фармери дека ќе ја попречат трката, ако не бидат исполнети нивните барања за подобар надомест за одземената земја за изградба на патеката.
„Ние работевме тука со целосна соработка на локалните жижели“, изјави Гаур. „Повеќе од уверени сме дека ќе бидеме домаќини на мирна трка. настанот ќе биде сто проценти успешен“.
Првата трка за Големата награда на Индија во Формула 1 ќе се одржи на 30 октомври.
|
