19.10.2011, 15:31 Заменети бебиња во Медицинскиот центар во Кочани
Иван Бојаџиски
Штип – Триесетгодишна родилка од Пехчево, која пред четири дена родила ќерка на гинеколошко-акушерското одделение во болницата во Кочани, завчера си заминала за родниот град со машко бебе! Родилката и нејзиниот сопруг Александар се стаписале кога во присуство на доктор-педијатар од Пехчево, откако го донеле дома, првпат го расповиле бебето за докторката да го прегледа и за да го избањаат нивното бебе.
„Со сопругата знаевме дека семејството ни се зголеми со ќеркичка. Тоа е наша прва рожба и бевме неизмерно среќни од приновата. Но, се шокиравме кога сопругата и бебето ги донесовме дома и викнавме педијатар од нашиот град за да го прегледа. Наместо ќерка, дома сме донеле син! Веднаш се јавивме во болницата во Кочани и во полицијата во Берово. Не сме свесни што ќе се случеше, ако сменетите бебиња беа од ист пол. Дали цел живот и ние и другото семејство ќе одгледувавме деца на кои не сме им биолошки родители?“, реагираше Александар.
Во моментот кога родилката од Пехчево си заминувала дома со бебето што и' го дала сестрата што била на смена со зборовите „Нека ви е со среќа, нека е живо и здраво и да дочека длабока старост“, на гинеколошко-акушерското одделение во кочанската болница имало само четири бебиња. Иронијата на овој скандал да биде поголема, две бебиња биле близнаци, што значи дека двете преостанати бебиња биле токму машкото и женското што биле заменети од дежурната сестра.
„Сигурно дека во овој случај постои место за одговорност, но таа не може да падне на целото одделение или на целата болница, туку само на дежурната акушерка, која, најверојатно, од невнимание ја направила размената на бебињата. Ние ќе го испитаме случајот од сите аспекти, а јавноста и надлежните ќе бидат на време известени за нашите одлуки“, вели Фанзи Јуруков, специјалист-гинеколог, раководител на гинеколошко–акушерското одделение во болницата во Кочани.
Александар, таткото на заменетото бебе од Пехчево, вели дека ќе направи ДНК-анализа. Не само заради тоа што се такви законите кога ќе се случат вака драматични настани, туку и заради лична сигурност, односно за тие како семејство да бидат сосема уверени во фактот дека бебето што го донеле дома од кочанската болница е нивното.
Родителите на бебето од Пехчево завчера вечер се вратиле во Кочани каде што во болницата била регистрирана замената, па секоја од родителките со своето вистинско бебе си заминала дома. Родителите на машкото бебе, за кои се шпекулира дека се од Кочани, сакале да останат настрана од јавниот интерес во врска со овој случај. |
