19.10.2011, 16:06 Судењето на „тигарот“ на 2 ноември
Припадникот на полициската единица „тигар“, Игор Спасов е обвинет за убиството на Мартин Нешкоски.
Судењето на Игор Спасов, припадник на специјалната полициска единица „Тигри“, обвинет за убиство на младиот Мартин Нешкоски, ќе почне на 2 ноември. Од Скопскиот кривичен суд појаснуваат дека освен денот за кога е закажан стартот на овој судски процес, судскиот совет ја утврдил и натамошната динамика на процесот и само за ноември се закажани уште пет рочишта. Брзото закажување на судењето доаѓа и поради тоа што одбраната на обвинетиот Спасов не вложи жалба на обвинението.
Пред само десетина дена, голема група млади се собраа пред Обвинителството, во знак на протест поради тоа што во актот што се однесува на Спасов не се најдоа и други лица, односно припадници на полицијата. Младите, кои низ разни форми и со различни содржини укажуваа на бруталноста во случајот на Нешкоски, со месеци бараат одговорност не само од припадниците на полицијата туку и од првите луѓе на МВР.
И додека врвот на МВР во неколку наврати тврдеше дека за смртта на Мартин е виновен исклучиво обвинетиот „тигар“, кој делото го сторил кога не бил работно ангажиран, тој во истрагата го тврдел токму спротивното.
Според исказот на Спасов, тој на плоштадот „Македонија“ не присуствувал како обичен граѓанин, туку како вработен во МВР со задача да го обезбедува премиерот. Обвинетиот Игор Спасов, пред истражен судија изјавил дека со неговите колеги, ноќта на петти јуни, биле работно ангажирани до 23 часот, а само половина час откако се вратиле во базата добиле усна наредба од нивниот претпоставен за враќање на плоштадот. Според Спасов, неговата обврска била да го обезбедува премиерот во еден поширок круг. Како што дознаваме,одбраната на Спасов веќе обезбедила и сведоци што ќе го потврдат неговото сведочење. (Љ.С.)
|
