21.10.2011, 11:13 ЕТА прогласи крај на вооружената борба
По повеќе од 40 години борба за независност на Баскија, милитантната сепаратистичка организација Баскиска татковина и слобода (ЕТА) денеска прогласи дефинитивен крај на своите вооружени активности.
- ЕТА реши целосно да прекине со вооружената борба. Организацијата упатува повик до владите на Шпанија и Франција за директен дијалог за надминување на последиците од конфликтот и да се стави крај на вооружениот судир, се наведува во Декларацијата на ЕТА објавена на интернет страната на шпанскиот весник на баскиски јазик „Гара“.
ЕТА во Декларацијата нагласува дека со оваа „историска одлука ја покажува својата јасна, цврста и конечна определба“ за ставање крај на вооружената борба.
Според ЕТА, Меѓународната конференција за шпанскиот регион Баскија, што заврши пред два дена, претставува иницијатива од големо политичко значење, бидејќи одлуките донесени на неа целосно ги обединуваат елементите потребни за надминување на конфликтот, кои се поддржани од баскиското општество и меѓународната заедница.
|
