21.10.2011, 15:44 СДСМ покрена постапка за утврдување на одговорноста за пропаѓање на пописот
Пратеничката група на СДСМ заедно со пратениците од другите партии од опозицискиот фронт поднесе кривична пријава против непознати сторители – членови на Владата на Република Македонија, членови на Државната пописна комисија и реонски попишувачи, заради покренување постапка за утврдување на одговорноста за пропаѓање на пописот и нанесување материјална штета на државниот буџет.
Ова денеска го изјави Ана Павловска-Данева, потпретседател на СДСМ и информира дека заедно со кривичната пријава бараат од Јавниот обвинител изрекување времена мерка со која ќе се спречи уништувањето на пописниот материјал.
Од СДСМ очекуваат дека Јавниот обвинител во најкус можен рок, рече таа, ќе забрани да се уништат пописните формулари кои се доказен материјал неопходен за утврдување на фактичката состојба.
- На тој начин ќе може да се утврди точно и прецизно, со име, презиме и функција, кој е одговорен за неуспешниот попис и за залудно потрошените 14 милиони евра на граѓаните, изјави Павловска-Данева.
По барање на новинарите да ја коментира најавата од ВМРО-ДПМНЕ дека ќе побараат да се формира Анкетна комисија за пописот од 2002 година, Павловска-Данева потенцира дека СДСМ ја поддржува идејата.
|
